Pandemia “eleminon” azilkërkuesit shqiptarë – Shifër rekord minimale gjatë majit, por sërish, të parët në rajon
Pandemia ka bërë që numri i shqiptarëve azilantë të bjerë në minimumin historik. Gjatë muajit maj, vendet e Bashkimit Europian numërojnë vetëm 66 aplikime për herë të parë për azil nga shtetas shqiptarë, tregojnë të dhënat e zyrës europiane të mbrojtjes së azilantëve. Kjo shifër është më e ulët edhe se muajt paraardhës kur panedmia ishte në kulmin e saj, mars dhe prill. Gjatë marsit, shifra i kalonte 400 aplikimet dhe gjatë prillit mbi 100.
Të dhënat e majit ndërkohë sinjalizojnë jo vetëm një rënie të fluksit për shkak të kufijve të mbyllur në Shqipëri dhe Europë, por ndoshta edhe një dekurajim për t`u larguar nga vendi si pasojë e situatës së krijuar në Europë gjatë kohës kur pandemia ishte ende në kulm. Këtë vit, me “ndihmën” edhe të pandemisë, ka rënë ndjeshëm numri i shqiptarëve të cilët janë në pritje për një përgjigje.
Në dhjetorin e 2019-ës ishin rreth 13 mijë shqiptarë të cilët prisnin kampeve të Europës për t`u strehuar, me arsyen se jeta e tyre në Shqipëri ishte në rrezik. Sot, janë rreth 5 mijë. Pavarësisht rënies së ndjeshme të kërkesave gjatë majit, Shqipëria vijon të jetë e para në rajon sa i përket numrit absolut të azilkërkuesve, si dhe e dyta në Europë, pas Ukrainës.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.