Pandemia godet linjën Emirates / Humbja e parë në 3 dekada. Merr 3.2 miliard USD ndihma nga Dubai
Linja ajrore Emirates theksoi se qeveria e Dubait do vazhdojë të mbështesë kompaninë gjatë pandemisë së koronavirusit, pasi publikoi një humbje vjetore prej 5.5 miliardë dollarë, që është e para në mbi 3 dekada. Kryetari i bordit të kompanisë, Ahmed bin Saeed Al Maktoum tha se rimëkëmbja nga pandemia do të jetë e pjesshme dhe se asnjë nuk e parashikon dot se kur do përfundojë. Qeveria e Dubait ka injektuar 1.1 miliardë dollarë shtesë tek linja ajrore, pasi ofroi 2 miliardë dollarë vitin e kaluar, sipas linjës Emirates. Kompania shtetërore e fluturimeve nuk është e vetmja linjë kombëtare që merr ndihmë qeveritare nga kriza. Në nisje të Javës, Lufthansa në Gjermani, që u detyrua të pranojë 9 miliardë euro ndihma në vitin 2020, shpalosi planet për t’u rikthyer në fitim, me më pak staf dhe aviona pas pandemisë. Emiratet, operacionet e të cilës varen nga udhëtimet ndërkombëtare, pati humbje prej 5.5 milairdë dollarë, nga një fitim prej 288 milionë një vit më parë, pasi të ardhurat ranë me 66% në 8.4 miliardë dollarë dhe trafiku i pasagjerëve ra me 88.3% në 6.6 milionë pasagjerë. Kjo është humbja e parë e Emirateve që prej vitit 1987 dhe numri më i ulët i pasagjerëve në 20 vite. Linja ajrore nuk ka ndonjë treg të brendshëm që të zbusë goditjen nga masat e karantinës.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.