Pandemia, kush pagoi më shumë për jetën? – Tirana, 1 miliard lekë për sigurimet. Dibra vetëm me detyrim

Afro 1.2 miliardë lekë kanë paguar qytetarët shqiptarë për siguracione jete gjatë vitit 2020, ku dhe pandemia Covid-19 ishte në kulmin e saj. Sipas të dhënave zyrtare të Autoritetit të Mbikqyrjes Financiare,  vlera më e lartë e primeve të shkruara bruto për siguracionin e jetes regjistrohet në Tiranë me rreth 1 miliardë lekë, e ndjekur nga Durrësi dhe Shkodra, ndërsa më e ulta në Dibër me 495 mijë lekë, ku vihet re se është paguar vetëm për  llojin e sigurimit “jetë debitori”,  i cili është detyrim për shkak kredie të marrë nga bankat tregtare.

Ndërsa në të kundërt, banorët e Tiranës kanë paguar për të gjitha llojet e sigurimit, si jetë debitori, jeta në grup, jetë e kombinuar, jeta dhe shëndeti në udhëtim, plani i pagesave cash si dhe jeta me kursim, ku kjo e fundit zë një pjesë të konsiderueshme. Sa i takon, numrit të kontratave të siguracioneve të jetës sipas prefekturave, totali regjistrohet në 89.689 përgjatë gjithë vitit që lam pas,  ndërsa Tirana sërish zë vendin e parë me mbi 71 mijë kontrata jete,  dhe Dibra përsëri listohet në vendin e fundit me vetëm 73 kontrata.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.