Pandemia/ Ndryshim tjetër në rregullat e prokurimit publik!

Këshilli i Ministrave ka miratuar një ndryshim në rregullat e prokurimit publik, duke i dhënë prioritet plotësimit të nevojave të Minsitrisë së Shëndetësisë në kushtet e pandemisë.

Referuar ndryshimit ligjor të miratuar në mbledhjen e fundit të qeverisë,  “përjashtimisht, gjatë gjendjeve të epidemisë të deklaruara zyrtarisht sipas legjislacionit në fuqi, ministria përgjegjëse për shëndetësinë dhe institucionet e saj të varësisë mund të prokurojnë mallra ose shërbime që mbulohen nga një marrëveshje kuadër nga operatorë ekonomikë të tjerë që nuk janë pjesë e marrëveshjes kuadër, në rast se operatorët ekonomikë të marrëveshjes kuadër kanë deklaruar me shkrim që, për shkak të gjendjes së epidemisë, janë në pamundësi për të përmbushur plotësisht ose pjesërisht detyrimin për të furnizuar mallrat ose shërbimet sipas marrëveshjes kuadër”.

Ndryshimi ligjor përcakton gjithashtu se në çdo rast, autoriteti kontraktor, përpara fillimit të çdo procedure të prokurimit publik për mallra ose shërbime që mbulohen nga një marrëveshje kuadër që nuk janë pjesë e marrëveshjes kuadër, është i detyruar për të kërkuar fillimisht furnizimin e mallrave ose të shërbimeve nga operatorët ekonomikë që kanë lidhur një marrëveshje kuadër.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.