Pandemia “rrezikon” skitë këtë dimër – Resortet përpiqen të shpëtojnë sezonin, por rregullat ndryshojnë në Europë
Resortet e skive po përpiqen të shpëtojnë sezonin, që me shumë mundësi do të jetë i vakët, ndërkohë që politikat kombëtare po zbehin shpresat për hapjen e tyre gjatë pandemisë.
Resortet në Itali po mbajnë shpresat tek rimëkëmbja e biznesit gjatë periudhës së Krishtlindjeve, por qeveria ka paralajmëruar qytetarët që të mos shkojnë për ski gjatë pushimeve, në mënyrë që të ngadalësohet pandemia. Kryeministri Giuseppe Conte ka thënë se këtë vit nuk do të jetë e mundur që të lejohen “pushimet në dëborë” dhe ka kërkuar që vendet europiane të bëjnë të njëjtën gjë. Megjithatë, pronarët e bizneseve në industrinë e skijimit janë shqetësuar.
“Kemi një infrastrukturë, kryesisht prej teleferikësh, që kërkojnë investime. Nëse investitorët goditen nga kriza ekonomike, nuk do të mbyllemi deri vitin e ardhshëm, por do na duhen disa vite që të rimëkëmbemi”, – tha Michele Bertolini, që drejton një grup lokal të interesit në rajonin Trentino, pranë Austrisë dhe Zvicrës.
Resortet në Zvicër janë hapur që tani dhe planifikojnë të qëndrojnë të hapura. Austria ndodhet në masa kombëtare të karantinës deri më 7 Dhjetor dhe resortet e skive synojnë të rihapen përpara Krishtlindjeve. Franca, nga ana tjetër, po mban resortet e hapura, por pistat e mbyllura gjatë Krishtlindjeve. Shijimi i skive në mal, ku ka hapësirë, zakonisht përfshin edhe kalimin e një pjese të madhe të kohës në ambiente të brendshme.
Disa teleferikë që çojnë vizitorët në mal, nuk ruajnë distancimin; restorantet e mbushura plot, janë e vetmja mënyrë për të ngrënë një vakt të ngrohtë dhe shumë skijatorë ndalojnë në bare gjatë kthimit. Me masat e distancimit social, reduktimit të kapacitetit dhe më pak vizitorë, sezoni do të jetë shumë më i dobët se ai i kaluari, edhe nëse resortet i’a dalin me sukses të hapen në Pranverë. Në resortin “Passi del Tonale” në Trentino, është krijuar një aplikacion që të bëjë vizitorët të ndihen të sigurtë. Aplikacioni shfaq sa njerëz ka në çdo teleferik dhe sa të gjata janë radhët.
Resortet e skive në Itali gjenerojnë të ardhura vjetore prej rreth 13 miliardë dollarë, ku një e treta e tyre vjen nga ditët që italianët shpenzojnë në Aplet dhe Dolomitet për Krishtlindje dhe Vit të Ri. Në përpjekje për të rihapur pistat, resortet në Itali kanë hartuar masa për numrin e pasagjerëve në teleferikë dhe biletat e shitura, por kjo kërkon miratimin e qeverisë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.