Pandemia “zhduk” azilkërkuesit shqiptarë. Eurostat: Shqipëria, vendi me tkurrjen më të madhe në botë të azilantëve krahasuar me vjet
Nga “Scan Intelligence Unit”
Është dashur të shpërthejë një pandemi dhe një krizë globale e paprecedentë gjatë shekullit të fundit, në mënyrë që shqiptarët të “zhduken” nga harta e azilkërkuesve në Europë. Agjencia Europiane e Statistiklave (Eurostat) ka publikuar shifrat më të fundit të azilkërkuesve gjatë tremujorit të tretë të vitit, të cilat tregojnë se, Shqipëria është vendi me rënien më të lartë mes të gjitha vendeve të tjera të botës të numrit të azilkërkuesve në Europë gjatë tremujorit të tretë të vitit. Rënia fiksohet në masën 77%.
Kështu, tremujori i tretë i këtij viti regjistrion vetëm 1040 azilkërkues shqiptarë për herë të parë nëpër dyert e Europës, nga rreth 4490 që ishin në tremujorin e tretë të vitit të kaluar. Kjo rënie drastike ka bërë që vendi ynë të largohet thuajse nga çdo klasifikim famëkeq në këtë drejtim. Në listën e 30 vendeve të origjinës së azilkërkuesve, Shqipëria ka zbritur në pozicionin e 25-të nga i 11-ti që ishte përpara pandemisë. Madje, ka disa shtete të tjera europiane, si Rusia apo Turqia që kanë shifra më të larta, në terma absolutë.
Sa i përket destinacioneve kryesore të shqiptarëve në Europë si azilkërkues në tremujorin e tretë të vitit, Franca mban vendin e parë, e ndjekur nga Greqia, Gjermania, Italia dhe në fund Belgjika. Këto 5 shtete zënë thuajse 94% të destinacioneve të shqiptarëve azilkërkues.
Eurostat njofton gjithashtu se në tremujorin e tretë të vitit janë marrë rreth 2000 vendime për shqiptarët azilërkues, nga të cilat vetëm 100, ose rreth 5% kanë qenë pozitive.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.