Pandemia “zhyt” industrinë, tërmeti nxit ndërtimin – Rënie e shitjeve, prodhimit dhe punonjësve në industri, “boom” në ndërtim

Sektori i prodhimit gjatë tremujorit të tretë të vitit ka regjistruar një performancë deri diku pozitive, me industrinë në rënie të lehtë krahasuar me një vit më parë, dhe me ndërtimin në rritje të ndjeshme, bazuar në indikatorin e shitjeve neto. Industria regjistron një rënie me 3.5% të këtij indikatori, me industrinë nxjerrëse në rënie drastike prej -18.5%, ndërkohë që ndërtimi regjistron një rritje prej 16.5% të shitjeve neto.

Edhe në prodhim situata është e ngjashme, me industrinë në rënie modeste prej 1.5% dhe me ndërtimin në rritje të ndjeshme, prej 14.8%, tregojnë shifrat më të fundit nga instituti i statistikave. Disi më ndryshe duket situata sa i përket numrit të të punësuarve.

Në industri indikatori i punonjësve regjistrohet në rënie prej diçka më shumë se 10%, ndërkohë që në ndërtim regjistrohet në rritje, paçka se jo me të njëjtin hap të rritjes së shitjeve apo prodhimit. Shifrat tregojnë kështu se industria, sidomos ajo nxjerrëse vijon të vuajë efektet e pandemisë, ndërkohë që ndërtimi po mbështetet fuqimisht nga procesi i rindërtimit.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.