Papa Françesku angazhon Vatikanin për zero emetime karboni deri në 2050. Thirrje liderëve globalë për më shumë vëmendje
Papa Françesku u ka bërë thirrje shteteve të punojnë drejt emetimeve zero të karbonit dhe shprehu angazhimin se Qyteti i Vatikanit – shteti më i vogël në botë – do të arriijë objektivin deri në 2050.
Francis, i cili ka përkrahur kauzat mjedisore që nga zgjedhja e tij në 2013, tha në një samit të Kombeve të Bashkuara për klimën se qyteti-shteti (44 hektarë) i rrethuar nga Roma do të bënte çmos për të luftuar ndryshimin e klimës.
“Pandemia aktuale dhe ndryshimi i klimës, të cilat nuk janë vetëm të rëndësishme për mjedisin, por edhe etikisht, shoqërisht, ekonomikisht dhe politikisht, ndikojnë, mbi të gjitha, në jetën e më të varfërve dhe më të brishtëve,” tha ai në një video-mesazh në samit.
“Përveç miratimit të disa masave që nuk mund të shtyhen më gjatë, duhet një strategji për të ulur në zero emetimet e karbonit”, tha Francis.
Ai angazhoi Vatikanin “për të ulur emetimet neto në zero deri në vitin 2050”, si dhe për të intensifikuar përpjekjet e menaxhimit të mjedisit dhe për të çuar më tej përdorimin racional të burimeve natyrore të tilla si uji dhe mbjellja e më shumë pemëve.
Një deklaratë e Vatikanit tha se qyteti-shtet po ecte përpara me planet për të zëvendësuar të gjitha makinat e tij me motor me djegie në automjete elektrike ose hibride.
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.