Papunësia në Europë vazhdon rritjen. Pandemia godet tregun e punës, pavarësisht rihapjes së ekonomive
Norma e papunësisë është rritur përsëri në Eurozonë, ndërkohë që pandemia e koronavirusit ka vazhduar të ndikojë tregun e punës. Papunësia në rajon qëndroi në 7.9% në muajin Korrik, sipas të dhënave zyrtare. Kjo vjen pas një norme të rishikuar prej 7.7% në Qershor. Të dhënat tregojnë një përkeqësim të perspektivës, por janë ende poshtë nivelit rekord të lartë të krizës së borxheve sovrane. Eurozona po përballet me një recesion të ashpër ekonomik, si pasojë e koronavirusit.
Ekonomia e 19 vendeve që ndajnë euron u tkurr me 12.1% në tremujorin e dytë, për shkak të masave për të ndaluar përhapjen e infeksionit. Tkurrja ishte më e keqja që kur nisën regjistrimet e të dhënave në vitin 1995, sipas Eurostat. Mjedisi i vështirë ekonomik po godet edhe të rinjtë, ndërkohë që norma e papunësisë për ata nën moshën 25 vjeç, u rrit në 17.3% në Korrik. Situata po ndikon gratë pak më shumë se burrat, pasi norma e papunësisë tek ato u rrit në 8.3% në Korrik, ndërsa tek burrat, u rrit në 7.6%.
Për të rimëkëmbur ekonomik, Bashkimi Europian ra dakord në Korrik për të marrë hua 750 miliardë dollarë euro, që do të investohen në programe përreth rajonit. Plani po shqyrtohet aktualisht nga politikanët europianë, që pritet t’i japin dritën e gjelbër në fund të vitit. Paralelisht, qeveritë e Bashkimit Europian duhet të krijojnë një dokument ku deklarojnë se si do të përdoren këto fonde. Përveç stimujve në rang të BE dhe kombëtarë, Banka Qendrore Europiane ka blerë gjithashtu obligacione qeveritare për të mbajtur kostot e financimit të ulëta.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.