Papunësia në Eurozonë – E pandryshuar në 9.1%, niveli më i ulët që prej 2009-ës
Norma e papunësisë në Eurozonë ka mbetur e pandryshuar në muajin Gusht në 9.1%, që është niveli më i ulët i regjistruar në bllokun e valutës së përbashkët që prej Shkurtit 2009, tregon zyra e Statistikave e Bashkimit Europian. Sipas të dhënave të Eurostat, tregut të punës i janë shtuar 42 mijë persona në një total prej 14,751 milionë.
Për Bashkimin Europian, treguesi ka rënë në 7.6% gjatë Gushtit, krahasuar me 7.7% që ishte në Korrik. Ndër vendet anëtare, norma më e ulët është regjistruar në Çeki, me 2.9%, ndjekur nga Gjermania dhe Malta me 3.6% dhe 4.1% në mënyrë respektive. Ndërkohë, niveli më i lartë qëndron në Greqi, në 21.2%, ndjekur nga Spanja me 17.1%. Megjithatë treguesi për të rinjtë, edhe pse në rënie, qëndron ende në nivele të larta dhe tregon pabarazi të mëdha në vendet anëtare.
Norma e papunësisë tek të rinjtë në Eurozonë qëndron në 18.9%. Në Greqi, kjo normë regjistrohet në 43.3% ndërsa Gjermani, ekonominë më të madhe të Europës, në 6.4%. Gjatë muajit Shtator, Presidenti i Bankës Qendrore Europiane, Mario Draghi, i vuri rëndësi treguesit për të rinjtë, duke thënë se ndikon negativisht në produktivitetin e firmave dhe i bëri thirrje qeverive të Eurozonës që të reformojnë tregjet e tyre të punës.
Megjithatë, Eurozona ndodhet në pozitë të fortë ekonomike, ndërkohë që Produkti i Brendshëm Bruto është rritur për të 17-in tremujor radhazi dhe papunësia qëndron në nivelin më të ulëta që prej krizës financiare. Edhe pse referendumi i Katalonjës shërben si një kujtesë për rreziqet politike, rimëkëmbja nuk ka gjasa të ndalojë. Banka Qendrore Europiane projekton një rritje me 2.2% këtë vit dhe pritet të lajmërojë përfundimin e programit të stimujve monetarë së shpejti.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.