Papunësia në rajon sipas KE – Shqipëria me normën më të ulët pas Serbisë

Komisioni Europian projekton që norma e papunësisë këtë vit në vendin tonë të zbresë në 13.7%, ndërkohë që vitin e ardhshëm projektohet të bjerë edhe më tej, në 13%.

Në krahasim me vendet e tjera të rajonit, rezulton se, Shqipëria është në pozita të favorshme në këtë drejtim. Më mirë se Shqipëria rezulton të jetë vetëm Serbia, ndër gjashtë vendet e Ballkanit Perëndimor.

Në Serbi projektohet që norma e papunësisë të bjerë në 9.5% vitin e ardhshëm, nga 22.1% që ishte në vitin 2013, pra një progres për t`u pasur zili. Në 2016, Serbia e parakaloi Shqipërinë në drejtim të normës së papunësisë.

Vendet e tjera të rajonit ndërkohë, kanë një normë papunësie mjaft të lartë, në mbi 20%, me përjashtim të Malit të Zi. Edhe Maqedonia projektohet të ketë një normë papunësie në 21% këtë vit dhe atë të ardhshëm.

Për Kosovën dhe Bosnje Hercegovinën ndërkohë, nuk ka projeksione të përditësuara. Edhe projeksione të tjera, si ato të Organizatës Ndërkombëtare të Punës tregojnë të njëjtën gjë, se Shqipëria është dhe do të jetë vendi i dytë në rajon sa i përket normës më ët ulët të papunësisë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.