Papunësia sfidon Macron. E bën objektiv të paarritshëm. Rritet me normën më të shpejtë në histori
Norma e papunësisë në Francë u rrit në nivelin më të lartë në 2 vite gjatë tremujorit të tretë, sipas zyrës së Statistikave në vend, ndërkohë që ekonomia e dytë më e madhe e Eurozonës po goditet nga kriza e Covid-19. Zyra deklaroi se norma e papunësisë u rrit në 9% nga 7.1% që ishte në tremujorin e dytë, që është niveli më i lartë që prej tremujorit të tret 2018. Kjo shënon rritjen më të madhe tremujore të papunësisë që prej vitit 1975, por norma është shtrembëruar në 2 tremujorët e kaluar, për shkak se njerëzit nuk mund të shikonin për punë nga muaji Mars në Maj, prej karantinës së parë. Rritja e papunësisë e cënon objektivin e presidentit Emmanuel Macron për uljen e papunësisë në 7% deri në fund të mandadit të tij.
Kur Macron mori detyrën, ai trashëgoi një normë të papunësisë prej 9.5% në vitin 2017. Franca regjistroi recesionin më të keq në histori në tremujorin e parë dhe të dytë, për shkak të karantinës kombëtare. Megjithatë, ekonomia u rimëkëmb në tremujorin e tretë, përpara se të vendosej një karantinë tjetër më 30 Tetor. Banka e Francës deklaroi në nisje të javës se ekonomia po operon 12% nën nivelin normal, prej karantinës.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.