Papunësia zbret në 12.4% – Por punësimi nuk është rritur
Shkalla e papunësisë ra sërish lehtë në tremujorin e dytë të vitit, duke vendosur një rekord të ri në ulje. Sipas Institutit të Statistikave, papunësia ishte 12.4%, nga 12.5% që kishte qenë tremujorin e mëparshëm.
Krahasuar me të njëjtën periudhë të një viti më parë, shkalla e papunësisë në ekonominë shqiptare ka rënë me 1.5 pikë përqindjeje. Shifrat e papunësisë duken edhe tepër pozitive, po të kemi parasysh se rritja ekonomike është akoma nën potencialin e vet.
Papunësia nuk ishte kaq e ulët as në vitet kur ekonomia shqiptare rritej gati dy herë më shumë. Përtej debateve mbi saktësinë statistikore, një hipotezë mund të jetë fakti se ekonomia shqiptare shfrytëzon së shumti faktorin punë, përkundrejt një shkalle më të ulët të shfrytëzimit të inovacionit dhe teknologjisë në proceset e prodhimit.
Sidoqoftë, të paktën për tremujorin e dytë, ulja e papunësisë nuk u shoqërua me rritje të shkallës së punësimit, që ngelin në nivelin 59.2%. Nëse shkalla e papunësisë mat numrin e të papunëve kundrejt forcës totale të punës, shkalla e punësimit jep raportin mes numrit të të punësuarve dhe popullsisë në moshë pune.
Një ulje e papunësisë në ekonomi jo domosdoshmërish shoqërohet me rritje të shkallës së punësimit. Shkalla e papunësisë mund të ndikohet edhe nga luhatjet në forcën e punës dhe në popullsinë ekonomikisht jo aktive. Këtu përfshihen edhe të dekurajuarit.
Sipas Instat, 8.1% e shqiptarëve në moshë pune nuk kërkojnë punë pasi kanë humbur besimin se mund ta gjejnë atë. Në përgjithësi, Shqipëria vazhdon të ketë një pjesëmarrje të popullsisë në forcën e punës, sidomos mes grave.
Vetëm 51.4% e grave mbi moshën 15 vjeç janë të punësuara ose në kërkim të një pune. Nga ana tjetër, gratë kanë edhe shkallën më të ulët të papunësisë, me 11.8%, ndërsa te meshkujt ky tregues është 12.9%.
Pjesërisht, kjo mund të shpjegohet edhe me faktin se pjesëmarrja e grave në tregun e punës është modeste. Një tjetër zhvillim për t’u përmendur në tremujorin II është rënia e mëtejshme e papunësisë mes të rinjve, që ka zbritur në 22.6%, niveli më i ulët historik.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.