Para’ për të rinjtë në bujqësi – Projekti pilot/ Financim për bizneset start-up, 75% e vlerës disbursohet direkt!
Për herë të parë qeveria do të aplikojë një skemë pilot që synon tërheqjen e fermerëve të rinj në biznesin bujqësor dhe rural si dhe lehtësimin e ngritjes rishtaz dhe zhvillimit të biznesit të tyre (start-up) me qëllim rinovimin të gjeneratës së fermerëve në sektorin e bujqësisë. Kështu, në strategjinë për zhvillimin e bujqësisë 2022-2027 është parashikuar që jashtë skemave të aplikuara aktualisht, të rinjtë të mbështeten për krijimin e bizneseve start up në këtë sektor.
Në dokument është parashikuar që përfitues të jenë fermerë të rinj meshkuj dhe femra (deri në 40 vjeç), drejtues të fermës me trajnime apo aftësi të përshtatshme. Mbështetja financiare do të sigurohet për fillimin e bizneseve rurale (start-up) të lidhura me bujqësinë, duke përfshirë krijimin e fermerëve të rinj, bazuar në një plan biznesi. 75% e mbështetjes do të jepet menjëherë pas miratimit dhe kontraktimit të planit të biznesit, dhe pjesa tjetër prej 25% në përfundim të zbatimit të planit të biznesit, por jo më vonë se 3 vjet nga momenti i nënshkrimit të kontratës.
Plani i biznesit duhet të përfshijë detyrimisht përafrimin e standardeve, mekanizimin/përmirësimin e produktivitetit të punës dhe përmirësimin e aksesit në treg. Prioriteti duhet të mbulojë sektorët me vlerë të lartë të shtuar dhe bujqësinë organike dhe të diplomuarit e rinj meshkuj dhe femra të universiteteve për bujqësi. Fermerët e rinj duhet të kenë prioritet trajnimet e lidhura me inovacionin.
Në përfundim të zbatimit të planit të biznesit, ferma duhet të jetë në përputhje me të gjitha standardet kombëtare. Numri i fermerëve të rinj të mbështetur me grante për start-up parashikohet të arrijë në 800 deri në vitin 2027. Deri në vitin 2024 për këtë qëllim është parashikuar të vendoset në dispozicion një fond prej 1 milionë euro. Mbështetja aktuale për fermerët e rinj është kufizuar në aplikimin e pikëzimit shtesë për të përfituar grante (në respektim të udhëzimeve të IPARD).
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.