“Paradise Papers” – 13.4 mln dosje ekspozojnë pasurinë e fshehur të super të pasurve

Një tjetër publikim të dhënash nga një firmë ligjore offshore, kërcënon të ekspozojë pasurinë e fshehur të kompanive multinacionale, liderëve të shteteve, figura të politikës, si dhe të fondeve mbrojtëse. Një vit pas “Panama Papers”, një publikim masiv i 13.4 milionë dosjesh nga firma ligjore në Bermuda, “Appleby Group Services”, ka hedhur dritë mbi përdorimin e llogarive offshore.  Materiali është siguruar nga e përditshmja gjermane “Suddeutche Zeitung” dhe është ndarë nga Konsorciumi Ndërkombëtar i Gazetarëve investigativë dhe media të tjera.

Ky projekt, është quajtur “Paradise Papers”, dhe ndër  zbulimet më kritike të publikuara deri më tani  përfshijnë: miliona paund nga prona private e Mbretëreshës të investuara në një fond në ishujt Kajman.

Dokumentet zbulojnë se sekretari i tregtisë në SHBA, Wilbur Ross, zotëron aksione në një kompani të dërgesave në det, Navigator Holdings, që ka marrë më shumë se 68 milionë dollarë të ardhura që prej vitit 2014, nga një kompani ruse e energjisë, të zotëruar nga dhëndri i presidentit të Rusisë, Vladimir Putin.

Republikanët në kongres pritet të vonojnë reformën e tyre tatimore, pasi raporti investigativ tregoi për shmangie tatimore nga kompanitë multinacionale amerikane përfshirë Apple dhe Nike. Autoritetet tatimore në Kanada po shqyrtojnë raporte që lidhin mbledhësin kryesor të fondeve për Kryeministrin Justin Trudeau me një kompani offshore në Karaibe. Ndër kompanitë e mëdha multinacionale, tregtuesi i lëndëve të para Glencore, ishte një ndër klientët kryesorë të Appleby.

Këto informacione pritet të rrisin tensionet te liderët botërorë, përfshirë Trump dhe kryeministren e Britanisë Theresa May, që kanë premtuar për frenimin e skemave të shmangies tatimore.  Në qendër të skandalit është firma Appleby, që ka mohuar akuzat. “Ne japim këshilla për klientët mbi mënyra legjitime për të ndërmarrë biznesin e tyre”, deklaron firma.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.