“Paradoksi” i besimit – Rënie e fortë, pavarësisht rritjes së PBB dhe punësimit
Treguesi i ndjesisë ekonomike shënoi një rënie të thellë dhe të papritur në tremujorin e dytë të këtij viti. Sipas vrojtimit të Bankës së Shqipërisë, ky tregues ra me 9.9 pikë, duke pasqyruar përkeqësimin e besimit në të gjithë sektorët e ekonomisë, përfshi edhe konsumatorët. Shërbimet janë dega e ekonomisë që gjatë viteve të fundit kanë shfaqur performancën më të mirë, si në treguesit e matshëm, ashtu edhe në indekset e besimit.
Megjithatë, për tremujorin e dytë të vitit, treguesi i besimit në sektorin e shërbimeve ra me afro pikë 9 përqindje krahasuar me tremujorin e mëparshëm. Sipas anketimit, kjo erdhi sidomos nga rënia e ndjeshme e kërkesës për shërbime në ekonomi. Edhe në sektorin e tregtisë, degë e shërbimeve që matet veç në vrojtim, treguesi i besimit ra me 3.3 pikë përqindje. Bizneset tregtare dhanë përgjigje më negative sidomos për sa i përket pritshmërive për punësimin. Edhe sektori i ndërtimit pësoi rënie të besimit për të tretin tremujor radhazi, me 1.9 pikë përqindje.
Kjo rënie përputhet me sinjalet e ngadalësimit të këtij sektori gjatë tremujorëve të fundit, çka e tregojnë edhe të dhënat mbi prodhimin e brendshëm bruto apo indeksi i shitjeve të këtij sektori. Rënia u përcaktua nga pakësimi i kontratave porositëse, ku indeksi ra me 4.2 pikë përqindje.
Besimi rezultoi në rënie edhe mes bizneseve prodhuese, me 3.7 pikë përqindje. Ndërmarrjet e sektorit të industrisë raportuan ecuri më negative të prodhimit, kontratave dhe rritje të inventarëve. Treguesi i besimit konsumator ra për të tretin tremujor radhazi, me 1.8 pikë përqindje. Rënia u përcaktua kryesisht nga pritshmëritë më pesimiste për gjendjen e ardhshme të bilanceve familjare.
Rënia e besimit në tremujorin e dytë të vitit duket deri diku paradaksale, po të kemi parasysh se përgjithësisht statistikat makroekonomike dhe sidomos treguesit e prodhimit dhe punësimit janë në përmirësim të ndjeshëm. Për tremujorin e parë të vitit, ekonomia u rrit me 4.45%, shumë më mirë se parashikimet, sado që e ndikuar sidomos nga rritja e përkohshme e prodhimit energjetik. Ndërkohë, sipas Instat, papunësia ka zbritur në 12.5%, niveli më i ulët i regjistruar nga statistikat zyrtare.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.