Paradoksi italian: Kompania e njohur kërkon 6 mijë punëtorë, por drejtuesi ankohet: Nuk kam ku t’i gjej
“Në 2-3 vitet e ardhshme kemi nevojë për 5-6 mijë njerëz, por nuk e di ku të shkoj t’i gjej“. Kjo është deklarata e Giuseppe Bono, CEO i Fincantieri, në një konferencë të CISL. “Ne po hasim vështirësi në gjetjen e njerëzve që të punojnë për ne”, u shpreh ai. Bono më pas shpjegoi se grupi është kryesisht në kërkim të marangozëve, saldatorëve, zanate që nuk janë më aq të lehta për t’u gjetur në Itali. “Kemi kantiere ndërtimi në Rumani dhe punëtorët i marrim nga Vietnami, por edhe atje do vijë një ditë që nuk do të ketë më.”
Një deklaratë që duket të pasqyrohet në numra sikurse është paraqitur në tabelën e mëposhtme. Në fakt, nëse shohim të dhënat më të fundit nga sistemi informativ Excelsior i kompanive Union Camere-Anpal për muajin korrik janë parashikuar rreth 60 mijë punësime të punëtorëve të specializuar, me vështirësi në gjetje në më shumë se një në tre raste (36%), shifër që është më e lartë se mesatarja e përgjithshme prej 26.6%.
Më të kërkuarit janë punëtorët e specializuar në instalimin dhe mirëmbajtjen e pajisjeve elektrike dhe elektronike të cilët arrijnë në një vështirësi për t’u gjetur në vend, në shifrën e 53.5%, të ndjekur nga 49.8% e saldatorëve, ndërsa më pas vijnë marangozët e prodhuesit e veglave me 49.6%.
Këto të dhëna theksojnë një paradoks që ka përfshirë Italinë prej vitesh: Nga njëra anë, shkalla e papunësisë mbetet në nivele alarmante mes të rinjve (në maj kjo ishte 30.5%, më e larta pas Greqisë dhe Spanjës), nga ana tjetër ka vende punë që mbeten bosh sepse kompanitë nuk gjejnë kandidatë me aftësi në përputhje me nevojat e tyre. (Ilsole24ore)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.