Paraja cash, “mbreti” i pagesave – PayPal: Pavarësisht rritjes së pagesave dixhitale, njerëzit e preferojnë

Firma e pagesave në rrjet, PayPal, bëri të ditur se paraja fizike ka ende rëndësi dhe nuk do të zëvendësohet në të ardhmen e afërt. Shumë kompani po përpiqen të krijojnë një ekonomi të pagesave dixhitale, por përballen me konkurrencë të fortë, sipas PayPal.

Vitin e kaluar, një studim i firmës së konsulencës Capgemini dhe bankës BNP Paribas, parashikoi se deri në vitin 2020, njerëzit në të gjithë botën do të zhvillojnë rreth 728 miliardë transaksione duke përdorur teknologjinë e pagesave dixhitale. Studimi zbuloi se tregjet në zhvillim, pritet të nxisin këtë trend.

Zhvillimet në teknologjitë e reja se kartat pa kontakt dhe realiteti i shtuar,  do të nxisin transaksionet pa para në të ardhmen, sipas studimit. Megjithatë, vuri në dukje se paraja cash mbetet metoda kryesore te përdoruesit.

Më herët gjatë vitit, një studim i PayPal, zbuloi se paraja cash është ende mbreti në Azi, përveç Kinës, ku shumica e të intervistuarve u përgjigjën se preferojnë pagesat dixhitale.

Banka Qendrore Europiane bëri të ditur në një raport se shumica e njerëzve në Eurozonë kanë përdorur cash për të paguar për mallrat dhe shërbimet në vitin 2016, kryesisht për produkte me vlerë të vogël, poshtë 15 eurove.

Megjithatë, në vitet e fundit, forma të reja të pagesave në rrejt janë zhvilluar, përfshirë portofolet në celularë dhe kriptovalutat. Sipas PayPal, zëvendësimi  i parasë fizike do të kërkojë kohë.

Sipas firmës,  janë tre lëvizje që kompanitë e pagesave bëjnë për të bindur njerëzit që të zëvendësojnë paranë fizike. Siguria mban vendin e parë, ndjekur nga privatësia dhe besueshmëria. Me pagesat dixhitale, përdoruesit kërkojnë të dinë nëse paraja është e sigurt dhe mënyra se si e shpenzojnë është private.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.