Paraja në qarkullim rritet me 0.6% – Gjatë shkurtit prek vlerën e 356 mld lekëve, në rritje me 56 mld lekë në 1 vit

Treguesi i parasë në qarkullim është rritur lehtë gjatë muajit shkurt të këtij viti, për të prekur shifrën e 356 mld lekëve, çka përkthehet në rreth 2.9 mld euro. Rritja e lehtë, prej 0.6% në terma mujorë, vjen pas rënies së këtij treguesi në muajin e parë të vitit. Në terma ndryshimi mujor, rritja rezulton lehtë më e ulët se muaji shkurt i një viti më parë, kur paraja në qarkullim rritej me 0.8%.

Krahasuar me shkurtin e vitit paraardhës, janë rreth 56 miliardë lekë më shumë para në qarkullim në ekonominë shqiptare, ose rreth 50 milionë euro, tregojnë shifrat zyrtare nga Banka e Shqipërisë. Treguesi që flet për 356 miliardë lekë para në qarkullim gjatë shkurtit ka prekur kështu një nivel të ri historik.

Paraja në qarkullim mat vetëm nivelin e monedhës vendase në qarkullim dhe asnjë valutë të huaj, duke llogaritur diferencën e parasë së emetuar nga Banka e Shqipërisë dhe sasisë së parave që gjendet akoma në arkat e institucionit, pra të gjithë sasinë e lekut shqiptar që është në qarkullim në sistem, jashtë dyerve të Bankës së Shqipërisë.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.