“Paraja Sovrane” në Zvicër – Votuesit refuzojnë planin për të ndryshuar rrënjësisht sistemin bankar
Plani për të transformuar sektorin financiar të Zvicrës, duke ndaluar bankat tregtare që të krijojnë para në mënyrë elektronike kur japin hua, është refuzuar nga votuesit zviceran ditën e Diel.
Më shumë se 75% e refuzuan iniciativën e parasë sovrane, sipas rezultatit zyrtar të publikuar nga qeveria zvicerane.
Të gjithë kantonet e vendit votuan gjithashtu kundër në referendum, ku duhej shumica nga 26 kantonet e vendit si dhe shumica e thjeshtë e votuesve për të arritur në një rezultat.
Shqetësimet mbi rreziqet e mundshme ndaj ekonomisë zvicerane prej prezantimit të një sistemi të “parasë reale”, bindën votuesit për të refuzuar propozimin. Qeveria zvicerane, që kishte kundërshtuar planin për shkak të pasigurive që do të shkaktonte, e mirëpriti rezultatin.
“Zbatimi i një skeme të tillë do të ishte thuajse i pamundur”, deklaroi Ministri i Financave Ueli Maurer. Votimi, i thirrur nën sistemin e demokracisë direkte të Zvicrës pas arritjes së më shumë se 100,000 firmave, synonte që të kthente Bankën Qendrore të Zvicrës në organin e vetëm të aturoizuar për të krijuar para në vend.
Një pjesë e parasë nuk krijohet nga bankat qendrore, por në mënyrë elektronike nga bankat tregtare, kur japin hua sipër nivelit të depozitave që mbajnë nga kursyesit.
Nëse do të votohej pro, Zvicra do të ishte vendi i vetëm që do të prezantonte një skemë të tillë, duke bërë që kundërshtuesit ta quanin një eksperiment të rrezikshëm që do të dëmtonte ekonominë.
Mbështetja për reformën është rritur që prej krizës financiare globale, me synim që sistemi financiar të bëhej më i sigurt dhe kursimet e njerëzve të mbroheshin gjatë arratisjes drejt bankave.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.