Paralajmërimi i “BIS” – “Luhatjet në tregje të mos pengojnë normalizimin e politikave monetare”

Banka e Rregullimeve Ndërkombëtare bën të ditur se luhatja e fundit në tregjet financiarë ndërkombëtarë, nuk duhet të ndryshojë planet e bankave qendrore për të rritur normat e interesit dhe përfunduar stimujt monetarë. Raporti i fundit i institucionit me seli në Bazel,  thekson se pas një periudhe të gjatë të qetësisë në tregje, luhatjet janë të pashmangshme dhe se shqetësimet në lidhje me luftat tregtare, po e vështirësojnë normalizimin e politikave monetare.

Megjithatë, përpjekja në rritjen e normave të interesit, që nisi në Shtetet e Bashkuara dhe po përhapet gradualisht, duhet të vazhdojë.  “Luhatja e tregjeve që ndodhi një muaj më parë nuk do të jetë e fundit. E Ardhmja e tregjeve financiarë dhe ekonomisë globale është e panjohur”, tha Claudio Borio, kreu i departamentit ekonomik dhe monetarë të institucionit, duke i’u referuar periudhës së daljes nga stimujt monetarë dhe normave rekord të ulëta të interesit.

Ai përmendi gjithashtu riskun që investitorët kishin marrë përpara atij eventi.  Sipas raportit, ka patur një rritje të madhe të fondeve pasive që thjesht ndjekin indekset e titujve të kapitalit (S&P500) dhe rritja e këtyre fondeve mund të ndryshojë mënyrën se si tregjet reagojnë në periudha të stresit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.