Paralajmërimi i PD-së/ Teliti flet për një dokument konfidencial: Të ardhurat nga tatimet e doganat do të jenë 90-100 milion usd më pak
Partia Demokratike deklaron se kryeministri Edi Rama ka në tryezën e tij të punës një dokument konfidencial, ku parashikohet që, me ritmet aktuale, të ardhurat nga tatimet e doganat do të jenë 90 – 100 milionë dollarë më pak këtë vit. Në daljen për mediat, Drejtori i Kabinetit në PD Dorian Teliti tha se “qeveria do të miratojë së shpejti në parlament aktin normativ që vulos dështimin e Edi Ramës me ekonominë edhe këtë vit”.
“Me gjithë përpjekjet tinzare për të fshehur dështimin, të gjithë treguesit flasin për përkeqësimin e mëtejshëm të ekonomisë së vendit, për më pak punë, për më pak para në xhepat e shqiptarëve.
Akti normativ qeveritar:
- Fsheh të vërtetën mbi dështimin e mbledhjes së të ardhurave.
- Nuk parashikon shpërblime për pensionistët dhe të pamundurit.
- Ul ndjeshëm investimet në projekte zhvillimore dhe infrastrukturë.
- Braktis qëllimisht ish të përndjekurit.
Ecuria negative e mbledhjes së të ardhurave, ku vetëm nga tatimet dhe doganat në 8 muajt e parë, mungonin mbi 60 milion dollarë, do të vazhdojë të thellohet akoma edhe më shumë gjatë muajve të fundit të vitit. Edi Rama ka në tryezën e tij të punës një dokument konfidencial, ku parashikohet që, me ritmet aktuale, të ardhurat nga tatimet e doganat do të jenë 90 – 100 milionë dollarë më pak” tha Teliti.
Sipas tij, qeveria nuk ka para për shpërblimin e fundvitit të pensionistëve, për ish të përndjekurit apo për investime publike por “paguan me miliona oligarkët dhe klientët e vet”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.