Paralajmërohen kompanitë e ndërtimit, punimet në Tiranë-Qafë Kashar e Tiranë-Kamëz, Bardhi: Të mos nxjerrin asnjë makineri!

Pas publikimit të njoftimit të Autoritetit Rrugor Shqiptar për nisjen e punimeve në akset rrugore Tiranë-Qafë Kashar dhe Tiranë-Kamëz nga dita e nesërme deri me 19 shkurt, ka reaguar edhe Partia Demokratike duke e cilësuar këtë vendim si të pamotivuar dhe që lidhet me protestën e njoftuar për në datën 16 shkurt.

Në emër të kësaj force politike, Sekretari i Përgjithshëm i PD-së Gazment Bardhi tha se bllokimin i dy akseve kryesore kombëtare që lidhin Tiranën me Veriun dhe Jugun e Shqipërisë është një përpjekje për të penguar qytetarët që të vijnë në Tiranë për të protestuar.

“Teknikisht, nuk ka asnjë motiv për bllokimin e autostradës dhe rrugëve të tjera kombëtare. Teknikisht, nëse do të ishte vërtet e nevojshme dhe jo një vendim në kushtet e panikut, qytetarët duhet të ishin lajmëruar disa ditë më parë, siç është vepruar në raste të tjera.  I ka bërë prapë llogaritë gabim! Edi Rama dhe kushdo tjetër që pranon të përdoret në këtë skenar është i pafuqishëm të ndalë shqiptarët të vijnë në protestë!” tha Bardhi.

Në vijim të deklaratës së tij, ai paralajmëroi kompanitë e ndërtimit që të mos nxjerrin në rrugë asnjë makineri  dhe të mos bëjnë asnjë veprim që cënon lëvizjen e lirë të protestuesve drejt Tiranës! “Përndryshe fati i tyre është i njohur! Qytetarët do t’i heqin pengesat me mënyrat e tyre, njësoj siç bënë banorët e Unazës së Re!” tha Bardhi duke shtuar se “për çdo pasojë që sjell zbatimi i këtij skenari që pengon protestën e 16 Shkurtit, Edi Rama do të jetë i vetmi që do të mbajë përgjegjësi”.

Devijohet qarkullimi i automjeteve në akset Tiranë-Qafë Kashar dhe në aksin Tiranë-Kamëz! ARRSH: Punimet nga 14 deri më 19 shkurt

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.