Paralajmëron BQE – Krijimi i pafrenuar i kreditit rrezikon krijimin e një flluske financiare
Aftësia e pakufizuar e bankave për të gjeneruar kreditim duke ripërdorur disa herë të njëjtin aktiv si kolateral duhet të frenohet, përndryshe rrezikon krijimin e një flluske financiare, thotë Zv/presidenti i Bankës Qendrore Europiane.
Komentet e Vitor Constancio nënvizojnë shqetësimet e institucionit mbi perspektivën e një fuqizimi të ri në huadhënien e firmave financiare, në një kohë kur politikat lehtësuese rrisin aftësinë e bankave për të zgjeruar kreditimin dhe oreksin e investitorëve për rrezik. Megjithatë, këto politika kanë gjasa të bezdisin disa bankierë dhe menaxherë të fondeve, të cilët janë ankuar për mungesën e titujve të borxhit me vlerësim të lartë që të këmbehen me para, në të ashtuquajturat marrëveshje të riblerjes, si rezultat i rregullave më strikte dhe blerjeve masive të BQE të këtij instrumenti.
Constancio paralajmëroi kundër përpjekjeve për të përjashtuar marrëveshjet e riblerjes nga llogaritja e levës financiare të bankave, që është masa më e gjerë për të matur riskun që këtyre u lejohet të marrin në raport me kapitalin që kanë. “Një fushë që përbën gjithashtu shqetësim është rihipotekimi dhe ripërdorimi i kolateralit”, tha Vitor Constancio në një konferencë të BQE.
“Ekzistojnë tentativa për të përjashtuar marrëveshjet e riblerjes (REPO) nga kalkulimi i levës financiare që jo vetëm ul standardet, por eliminon gjithashtu të vetmin mekanizëm frenimi drejt kapacitetit të bankave për të krijuar likuiditet të pafrenuar të brendshëm”, tha Zv/presideni.
Rregullatorët globalë të bankingut në Komisionin e Bazeli janë duke përpunuar rregulla të reja, përfshirë mbi levën financiare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.