Paralajmëron OBT – Brexit pa marrëveshje do të ketë kosto të mëdha për disa sektorë

Drejtori i Përgjithshëm i Organizatës Botërore të Tregtisë, Roberto Azevedo, tha se nëse Mbretëria e Bashkuar del nga Bashkimi Europian pa një  marrëveshje,  do të ketë kosto marramendëse për disa pjesë të ekonomisë së vendit. Qeveria britanike po përpiqet të gjejë një konsensus në parlament mbi kushtet e daljes nga Bashkimi Europian,  përpara afatit të 12 Prillit.  Azevedo tha se ekonomistët  po vlerësojnë ndikimin e mundshëm të daljes pa marrëveshje, ç’ka do të bënte që Britania të tregtonte me rregullat e Organizatës Botërore të Tregtisë.

“Do të ketë kosto dhe këto do të jenë shumë të mëdha për disa sektorë dhe më pak në të tjerë.  Por në total, do të ketë një ndikim dhe të gjithë e dimë.”

Paralelisht, Azevedo paralajmëroi për konfliktin mbi të ardhmen e trupit të apelit të Organizatës Botërore të Tregtisë, që është gjykata kryesore e tregtisë botërore. Washingtoni ka argumentuar prej kohësh se gjykatësit e Organizatës kanë dalë ndesh me procedurat dhe kanë kaluar mandatet e tyre.  Në përpjekje për të detyruar reforma, SHBA ka bllokuar emërimin e gjykatësve. Azevedo tha se vendet anëtare të Organizatës Botërore të Tregtisë po kërkojnë një mënyrë për të kaluar këtë ngërç, duke theksuar se është një problem kryesisht i Shteteve të Bashkuara.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.