Parashikime të “turbullta” për ekonominë ruse – Kreu i Bankës Qendrore: Dy vjet për t’u kthyer në objektivin e inflacionit!

Ekonomia e Rusisë nuk mund të mbijetojë pafundësisht me rezervat e saj financiare dhe do të duhet të transformohet për të përballuar ndikimin e sanksioneve ndërkombëtare, deklaroi guvernatorja e Bankës Qendrore, Elvira Nabiullina.

Në fjalimin e saj më domethënës që kur Rusia dërgoi forcat e saj në Ukrainë më 24 shkurt, Nabiullina tha se deri në vitin 2024 inflacioni mund të rikthehet në objektivin prej 4%.

“Periudha kur ekonomia mund të vijojë me rezerva ka një fund. Tashmë në tremujorin e dytë dhe të tretë do të hyjmë në një periudhë transformimi strukturor dhe kërkimi për modele të reja biznesi,” tha ajo.

Sanksionet kishin prekur kryesisht tregun financiar, “por tani do të fillojnë të ndikojnë gjithnjë e më shumë në ekonomi”, shtoi kreu i Bankës Qendrore të Rusisë.

Sipas saj, problemet kryesore do të lidhen me kufizimet në importet dhe logjistikën e tregtisë së jashtme dhe në të ardhmen me kufizimet e eksporteve, çka detyron kompanitë ruse që të të përshtaten me këtë realitet të ri.

Banka qendrore po konsideronte ta bënte shitjen e të ardhurave nga forex nga eksportuesit më fleksibël, tha ajo, dhe po testonte gjithashtu emetimin e rublave dixhitale për t’u mundësuar rusëve të bënin transferime në këtë realitet. Operacionet pilot të lidhura me atë projekt ishin planifikuar në gjysmën e dytë të vitit.

Banka qendrore ruse rriti normën e saj bazë të interesit në 20% kur nisën sanksionet ndërkombëtare, por më pas e uli atë këtë muaj në 17%, duke shënuar një mjedis sfidues ekonomik dhe ngadalësim të inflacionit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.