Parashikimet për përmbytjet – Buletini: Ulen rreziqet, shtrëngata dëbore në zonat malore
Rreziku i përmbytjeve është ulur ndjeshëm nga paraditja e së hënës, por tekat e motit do të vazhdojnë, madje në disa raste do shënohen edhe shtrëngata dëbore. Është ku parashikimi i së hënës nga Qendra Kombëtare për Parashikimin dhe Monitorimin e Rreziqeve Natyrore.
Nga llogaritjet e fundit hidrologjike të kësaj qendre, rezulton se prurjet e lumenjve, do të kthehen në nivele normale për stinën dhe nuk janë të rrezikshme për përmbytje. Harta e së hënës e kësaj qendre dominohet tërësisht nga ngjyra e gjelbër, ndërkohë që tre ditë më parë dominohej nga e kuqja, për shkak të rreziqeve shumë të larta për përmbytje.
Megjithatë reshjet do vazhdojnë gjithë pasdites së të hënës, por në zona më të kufizuara. Intensiteti i tyre do të jetë i dobët në shumicën e rasteve, por në disa raste ato do të jenë intensive shoqëruar me shtrëngata, kryesisht në qarqet e Veriut dhe të Qendrës (me kohëzgjatje të shkurtër).
Reshjet do të jenë në formë dëbore në zonat malore, kryesisht në veri dhe lindje të vendit. Sa i përket së martës, Qendra parashikoi një ditë të qetë dhe pa reshje, e për rrjedhojë pa rreziqe për përmbytje.
L.R/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.