Parashikimet: Rritje çmimesh deri në verë – Do të vijojë ndikimi i rritjes së presioneve nga jashtë. Normalizimi pas mesit të vitit
Rritja e çmimeve me të cilën po përballen shqiptarët që prej muajve të fundit të vitit të shkuar, duket se do të vijojë përgjatë gjithë gjysmës së parë të vitit 2022. Duhet pritur vera që çmimet të tregojnë shenjat e para të normalizimit. Është ky parashikimi që bën Qeveria shqiptare në Planin Kombëtar për Integrimin 2022-2024.
Në aspektin makroekonomik, analizon Qeveria në dokument, rritja e inflacionit pasqyroi kryesisht goditjet që vijnë nga ambienti i huaj në formën e rritjes së çmimeve të lëndëve bazë, ndërkohë që presionet e brendshme inflacioniste kanë ardhur në rritje, por mbeten të moderuara.
Në afat të shkurtër presionet inflacioniste pritet të shtohen të ndikuara nga rritja e çmimeve në tregjet e huaja për mallrat bazë. Këto të fundit pritet të vijnë drejt normalizimit pas mesit të vitit 2022. Nga ana tjetër, presionet e brendshme inflacioniste pritet të forcohen në linjë me përmirësimin e aktivitetit ekonomik dhe shfrytëzimin më të plotë të kapaciteteve prodhuese. Kjo ecuri, parashikon Qeveria, do të shoqërohet me rritjen dinamike të pagave dhe të kostove të tjera të prodhimit, duke mbështetur kthimin e qëndrueshëm të inflacionit në objektiv. Inflacioni parashikohet të kthehet në objektivin prej 3%, brenda vitit 2022.
Ndërkaq, Tregu financiar është i qetë, normat e interesit mbeten në nivele të ulëta dhe primet e rrezikut kanë qenë të përmbajtura. Yield-et e letrave me vlerë të qeverisë janë luhatur pranë niveleve të vitit të mëparshëm, me një tendencë të lehtë rënëse në maturitetet afatgjata. Sistemi financiar ka patur hapësira të mjaftueshme për të plotësuar nevojat e qeverisë për financim pa reflektuar stres të shtuar. Normat e interesit të kredisë kanë vijuar të luhaten pranë niveleve të vitit 2020 për bizneset, mesatarisht prej 5.6%, dhe kanë rënë më tej për individët në 6.2%.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.