Parashikimi i Bill Gates në 2018: “Bota duhet të përgatitet për pandemitë sikurse për luftë!”
Qendrat për Kontrollin dhe Parandalimin e Sëmundjeve dhe zyrtarët shëndetësorë vazhdojnë të merren me shpërthimin e koronavirusit kinez, i cili ka shkaktuar viktima të shumta jo vetëm në Kinë por edhe jashtë saj tashmë. Por duket sikur ky fenomen nuk është aspak i papritur për Bill Gates i cili paralajmëroi në vitin 2018 se bota nuk ishte e përgatitur për pandemitë, të cilat “duhet të na shqetësojnë të gjithëve”.
Duke folur në një event të organizuar nga Massachusetts Medical Society dhe New England Journal of Medicine (NEJM) më 27 prill 2018, Gates tha se ai besonte se “bota duhet të përgatitet për pandemitë në të njëjtën mënyrë serioze që përgatitet për luftë.”
“Kjo përgatitje përfshin simulime në skenë, lojëra lufte dhe ushtrime të gatishmërisë në mënyrë që të kuptojmë më mirë sesi sëmundjet do të përhapet dhe si të merremi me raste të tilla si karantina dhe komunikimet për të minimizuar panikun,” tha Gates.
Pandemitë ndodhin kur përhapen epidemitë midis vendeve. Dhe megjithëse koronavirusi nuk konsiderohet si pandemi, përhapja e viruseve të tilla është një shqetësim serioz.
Gates vuri në dukje, gjatë shpërthimit të gripit H1N1 i vitit 2009 (i quajtur gripi i derrit) i cili nuk ishte aq vdekjeprurës sa menduan njerëzit fillimisht, që bota nuk ka një qasje të koordinuar për të ndihmuar në zbulimin dhe përhapjen e hershme të pandemive. Ai gjithashtu krahasoi pandemitë globale vdekjeprurëse në të ardhmen me një lloj të ri “armësh ushtarake”.
Gates kujtoi se në Konferencën e Sigurisë së Mynihut 2017 ai “u kërkoi liderëve botërorë që të imagjinojnë se diku në botë ekziston ose mund të dalë një armë e re që është e aftë të vrasë miliona njerëz, duke çuar ekonomitë në një ngadalësim të ndjeshëm dhe duke shkaktuar kaos kudo. Kjo duhet të shqetësojë të gjithë tha Gates, “sepse historia na ka mësuar se do të ketë një pandemi tjetër globale vdekjeprurëse. Për tu përgatitur më mirë, Gates tha që udhëheqësit botërorë duhet të investojnë në mënyra të tilla si ilaçet antivirale dhe terapitë e antitrupave që mund të grumbullohen ose prodhohen me shpejtësi për përhapjen e këtyre sëmundjeve të ardhshme.
Të Dielën, fondacioni Bill & Melinda Gates njoftoi se po dhuron 10 milion dollarë në “fonde emergjente dhe mbështetje teknike përkatëse për të ndihmuar përgjigjen e vijës së përparme në Kinë dhe Afrikë që të përshpejtojnë përpjekjet e tyre për të përmirësuar përhapjen globale të vitit 2019-nCoV (sic njihet ndryshe koronavirusi), sipas uebfaqes së fondacionit.
“Ne jemi thellësisht të shqetësuar për zhvillimin e epidemisë së tanishme dhe shprehim respektin tonë të lartë për ata që janë duke luftuar në vijat e para,” tha Yinuo Li, drejtori i Fondacionit Gates China në një prononcim për China Daily. (CNBC)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.