Parashikimi javor i motit/ SHMU: Vranësira dhe reshje shiu e dëbore në të gjithë vendin
Shërbimi Meteorologjik ushtarak ka publikuar parashikimin e motit për javën që presim para e cila parashikohet të jetë një javë “klasike” dimri ku shumica e ditëve do të kenë mot të vranët me reshje shiu e dëbore si dhe disa ditë me diell por të acarta.
Sipas njoftimit dita e Hënë parashikohet me mot kryesisht të vranët e alternime afatshkurtra në mesditë kthjellimesh si dhe me reshje shiu të herëpashershme me intensitet të ulët deri mesatar dhe në kohë afat shkurtër në zonën e veriut deri të lartë ndërsa në zonën e Alpeve, verilindje në lartësitë mbi 300 metër dhe juglindje mbi 800 metër do të ketë reshje tepër të dendura dëbore.
SHMU bën me dije se gjatë orëve të para të 24-orëshit të ditës së Martë reshjet vijojnë me intensitet mesatar deri dhe të lartë në një pjesë të madhe të territorit ndërsa pas orëve të mesditës reshjet humbasin intensitetin dhe bëhen të herëpashershme dhe intensitet të ulët. Ndërkaq në relievet malore në lindje të territorit reshje tepër të dendura dëbore te cilat gjatë ditës në zonën e veriut dhe jugut zbresin deri në lartësitë kodrinore 400-500 metër.
“Dita e Mërkurë dhe ajo e Enjte parashikohen të kenë mot kryesisht të kthjellët dhe vranësira kalimtare e reshje shiu të izoluara dhe lokale ndërsa java mbyllet me ditën e Premte me rikthim të motit të vranët e reshje shiu të herëpashershme me intensitet të ulët e lokalisht shtrëngata afatshkurtër. Duke nisur nga orët e pasdites reshjet bëhen të vazhdueshme me intensitet mesatar dhe të lartë në pjesën më të madhe të territorit. Përsëri reshje dëbore në relievet malore në lindje por me intensitet të ulët”, shkruhet në njoftim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.