Parisi “parakalon” Londrën, EY: Destinacioni kryesor në Europë për investimet e huaja direkte
Një sondazh i firmës britanike Ernst & Young tregoi se Parisi i ka zënë vendin Londrës si destinacioni kryesor i Europës për investitorët e huaj, për të parën herë që kur firma nisi raportin 15 vite më parë.
Ndryshimi i kësaj renditje në kontinent vjen prej ndikimit të Brexit dhe “efektit Macron”. Kryeqyteti francez u rëndit në vend të parë për investimet e huaja direkte nga 37% e bizneseve, sipas një sondazhi të 502 kompanive dhe të dhënave të Ernst & Young për 2017-ën.
Britania në tërësi, qëndroi destinacioni kryesor i Europës për investimet e huaja direkte në vitin 2017, me 1,205 nga 6,653 projekte të investimeve në Europë, përpara Gjermanisë me 1,124 projekte dhe Francës me 1,019.
Megjithatë, shifra në Francë rezultoi në rritje me 31% në një periudhë 1-vjeçare, ndërsa numri i investimeve në Britani u rrit me 6% nga viti 2016. Kjo është hera e parë që Parisi kalon Londrën që prej nisjes së sondazhit vjetor në vitin 2003. Berlini rezultoi në vend të tretë, ndërsa Frankfurti në të katërtin.
“Mbretëria e Bashkuar po ndjen efektin e Brexit. Investimet janë ngadalësuar pas krizës financiare të vitit 2008, por Franca po e merr veten tashmë dhe po përfiton gjithashtu nga Brexit”, nënvizon raporti, duke përmendur edhe reformat e Presidentit Emmanuel Macron në tregun e punës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.