Parkimi në Tiranë – Mbaron pilotimi, rezidentët pa pagesë në 4 zonat e administrimit
Pas pilotimit në disa zona të qytetit, Bashkia e Tiranës i hap rrugën parkimit pa pagesë për të gjithë rezidentët. Agjencia Tirana Parking ka hapur procedurën e prokurimit publik për prodhimin e këtyre kartave, me një vlerë prej 10.3 milion lekë, ndërkohë që referuar njoftimit, modelet e kartave janë për 4 zonat e administrimit të parkimit.
Operatorët e interesuar mund të dorëzojnë ofertat e tyre deri në datën 20 nëntor, ndërkohë që afati i zbatimit të kontratës është 20 ditë, çka do të thotë se ai do të finalizohet me nisjen e vitit 2018. Përfaqësues të bashkisë, thanë për TV SCAN se kjo procedurë do të mundësojë finalizimin e projektit për parkimin pa pagesë për të gjithë rezidentët, duke qenë se deri më tani ajo aplikohej vetëm në pak zona të Tiranës.
Me të mund të pajisen jo vetëm pronarët e banesave, por edhe qiramarrësit, që jetojnë për një kohë të gjatë, ndërkohë që ajo është e vlefshme vetëm për zonën e administrimit ku jetojnë dhe jo për 3 zonat e tjera.
Kjo pullë identifikuese është “e personalizuar” dhe do të duhet të vendoset brenda xhamit, në pjesën e përparme të automjetit, ku shënohet targa e automjetit, afati i vlefshmërisë, numri serial, si dhe numri i zonës.
Për t’u pajisur me këtë kartë, personat e interesuar duhet të paraqiten pranë drejtorisë së Përgjithshme të Agjencisë Tirana Parking, ku duhet të dorëzojnë dokumentet që vërtetojnë se qytetari është rezident. Vlefshmëria e saj është 12 muaj, ndërkohë që me përfundimin e këtij afati karta duhet rinovuar.
ZAP 1
Me kufij: Vija kufizuese e qytetit të Tiranës në pjesën Veri/Perëndimore, bulevardi “ZOG 1” në anën Lindore dhe kordoni hyrës me rrugët “Lazi Miho”, “Konferenca e Pezës” duke vazhduar përgjatë bulevardit “Gjergj Fishta” në anën jugore, deri në ndërprerjen me bulevardin “Dëshmorët e Kombit”
ZAP 2
Me kufij: zonën përgjatë bulevardit “ZOG 1” në pjesën perëndimore, vijën kufizuese të qytetit të Tiranës në pjesën Veri/Lindore dhe zgjatimin e bulevardit “Zhan D’Ark” deri në vijën kufizuese në anën Jugore.
ZAP 3
Me kufij: segmentin e bulevardin “Dëshmorët e Kombit” në anën perëndimore, bulevardi “Bajram Curri” dhe përgjatë lumit të Lanës deri në vijën kufizuese në anën veriore dhe vijën kufizuese të qytetit të Tiranës në pjesën Jug/Lindore.
ZAP 4
Me kufij : kordonin hyrës përgjatë rrugës “Konferenca e Pezës” në anën veriore, bulevardin vijën kufizuese të qytetit të Tiranës në anën lindore, zonën përgjatë segmentit të bulevardit “Dëshmorët e Kombit” në pjesën Lindore dhe vijën kufizuese të Tiranës në pjesën jugore të saj.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.