Parlamenti britanik thotë “OK” – Kërkon disa ndryshime për Brexit. Brukseli thotë Jo!
Kryeministrja e Britanisë, Theresa May, i’u afrua më pranë se kurrë arritjes së një marrëveshjeje për Brexit këtë javë.
Në një votim 317 pro/301 kundër, parlamenti i dha mbështetjen marrëveshjes së Theresa May, me kusht që do të bëhen ndryshime në çështjen e kufirit me Irlandën.
Kjo i jep Theresa May një mandat për t’u kthyer në Bruksel që të bëjë thirrje për rihapje të negociatave dhe tregon se Brexit do të kalojë më në fund në parlament nëse bëhen ndryshime.
Deputeti konservator Graham Brady, u quajt si shpëtimtari i marrëveshjes, duke përfshirë një pikë shtesë të rëndësishme në të. Sipas kësaj, marrëveshja kërkon që masa parandaluese e Irlandës së Veriut të zëvendësohet me një alternativë për të shmangur ashpërsimin e kufijve.
Këto fjalë mjaftuan për të fituar mbështetjen e Partisë Unioniste Demokratike si dhe politikanëve konservatorë.
Theresa May nuk ka shpallur ende fitoren, ndërkohë që zhvillimet në Londër morën një reagim të ftohtë në Bruksel dhe Dublin.
“Marrëveshja e daljes nuk është e hapur për rinegocime”, tha Kryeministri i Irlandës Leo Varadkar.
Ai shtoi se Irlanda do të vazhdojë përgatitjet për të gjitha rezultatet, përfshirë daljen pa marrëveshje.
Franca, anëtari i dytë më i fuqishëm i BE, deklaroi se nuk mund të ketë rinegociata dhe kërkoi një propozim të “besueshëm” të Brexit.
Presidenti i Këshillit Europian, Donald Tusk, tha gjithashtu se nuk do të ketë rinegociata.
Theresa May, me shumë gjasa, do të përpiqet të arrijë një marrëveshje të minutës së fundit duke përdorur kërcënimin e Brexit të ç’rregullt.
Nëse merr pëlqimin nga Brukseli, kryeministrja do të duhet të zhvillojë një votim tjetër në parlamentin britanik, me shpresën që të jetë votimi i fundit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.