Parlamenti merr nën kontroll Brexit – Do injorojnë May për një ditë ku do votojnë alternativat e Brexit
Deputetët britanikë kanë votuar për të marrë nën kontroll procesin e Brexit nga kryeministrja Theresa May për një ditë, në përpjekje për të gjetur një zgjidhje që mund ta mbështesë i gjithë parlamenti.
Masa u kalua me 329 vota në favor dhe 302 kundër. Kalimi i “amendamentit Letwin” ndryshon rregullat në Parlament, duke i lejuar deputetëve që të caktojnë një afat, ku do të debatohet dhe votohet për alternativat e mundshme të Brexit. Ditën e Mërkurë, deputetët do të kontrollojnë parlamentin për të votuar mbi disa rezultate të mundshme të Brexit. Kjo i heq pushtetin Qeverisë dhe i jep fuqi deputetëve që të zhvillojnë mocione të biznesit mbi daljen e Britanisë nga Bashkimi Europian.
Këto votime, do të mbahen për të bërë të ditur se çfarë kërkon parlamenti. Tashmë mund të votohet për marrëveshjen e May, anëtarësinë në tregun e përbashkët të Bashkimit Europian, një union doganor, një dalje pa marrëveshje, dalje e stilit kanadez me marrëveshje tregtare, një referendum të dytë apo anulimin e Brexit. Ndërkohë që këto votime nuk janë detyruese, është ende e mundur që Qeveria t’i injorojë rezultatet. Kryeminsitrja, Theresa May, tha se Qeveria e saj do të kundërshtojë mocionin e ditës së Hënë dhe nuk do të mbështesë asnjë konsensus që vjen nga këto votime.
“Votat mund të sjellin një rezultat që nuk mund të negociohet me Bashkimin Europian” -tha Theresa May. E vetmja marrëveshje e rënë dakord mes Bashkimit Europian dhe Qeverisë britanike është ajo e Theresa May, që u mposht bindshëm dy herë në parlament.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.