Parti e tretë në SHBA? 120 republikanë anti-Trump pretendojnë të thyejnë traditat historike të politikës amerikane

Më shumë se 120 Republikanë u takuan në Zoom javën e kaluar për të diskutuar mundësinë e formimit të një partie të tretë të qendrës së djathtë, njoftoi Reuters.

Partia do të përqendrohej në “konservatorizëm parimor” dhe ideale të tjera që grupi beson se u hodhën poshtë nga ish Presidenti Donald Trump.

“Pjesë të mëdha të Partisë Republikane po radikalizohen duke kërcënuar demokracinë amerikane,” i tha Reuters Evan McMullin, ish-drejtori kryesor i politikës për Konferencën Republikane të Dhomës. McMullin, i cili gjithashtu kandidoi për president si i pavarur në 2016, tha se ai ishte bashkë-nismëtar i thirrjes.

Në thirrjen për partinë e tretë u përfshinë dhe ish zyrtarë të zgjedhur dhe njerëz që kanë shërbyer në administratat presidenciale, duke përfshirë atë të Trump, George W. Bush, George H.W. Bush dhe Ronald Reagan, thanë burimet për Reuters.

Lajmi vjen ndërsa Partia Republikane po vuan një ndarje në rritje midis besnikëve të Trump dhe Republikanëve tradicionalë.

Raportet thonë se Trump ka konsideruar gjithashtu krijimin e një partie të tretë, me një emër të mundshëm që mund të jetë ‘Partia Patriot’, si një qortim i ligjvënësve republikanë të cilët ai mendon se nuk kanë qenë aq besnikë ndaj tij.

Trump aktualisht po përballet me gjyqin e tij të dytë të fajësimit për rolin në nxitjen e turmës së Kapitolit. Dhjetë anëtarë republikanë të Dhomës votuan në favor të fajësimit, duke e bërë atë më bipartizanin në histori, megjithëse shumica dërrmuese e Republikanëve votuan kundër tij.

Dosti Banushi – SCAN
Burimi: Business Insider

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.