Partnerët tregtarë më të vegjël të Shqipërisë – Mallrat shkojnë e vijnë edhe nga këto vende
Shpesh kur flasim për tregtinë e jashtme u referohemi gjithmonë shifrave më të mëdha, apo atyre që kanë patur ndryshimin më të madh në krahasim me një periudhë të mëparshme. Kështu, jemi të prirur t’u referohemi partnerëve të mëdhenj tregtarë si Italia, Kosova, Gjermania, Turqia e Spanja, duke anashkaluar vende më të vogla, apo që kanë më pak shkëmbime me ne.
Më poshtë është një listë me vendet ku ndoshta nuk e dinit se eksportohen mallra shqiptarë, apo prej nga ku hyjnë mallra në vendin tonë.
Me vetëm 1 milion lekë mallra të eksportuar dhe 4 milionë lekë në vlerë importesh Andorra mban titullin e partnerit më të vogël tregtar të Shqipërisë. Mikroshteti europian me vetëm 77 mijë banorë arrin të ketë një bilanc tregtar pozitiv prej 3 milionë lekësh.
Një tjetër shtet ku arrijnë mallrat shqiptare është edhe Malajzia. Me një popullsi prej rreth 32 milionë banorësh, është vendi i 27-të në botë për nga madhësia e Produktit të Brendshëm Bruto. Bilanci tregtar me këtë vend është edhe më i thellë në dëm të Shqipërisë, pasi vlera e importeve nga Malajzia është 832 milionë lekë.
Mes partnerëve të vegjël, për shkak të gjeografisë janë edhe vendet e Lindjes së Mesme, si Libania, Siria, Kuvajti, Irani dhe Izraeli. Me përjashtim të dy vendeve të fundit, Shqipëria ruan një bilanc tregtar pozitiv, ndonëse të ulët.
Një bilanc të mirë, Shqipëria e ka edhe me Maltën, e cila në Shqipëri eksporton vetëm 6 milionë lekë në vlerë mallrash, por importon mbi 8 miliardë lekë.
Nëse flasim për kontinente, Australia, Afrika dhe Amerika e Jugut janë partnerët më të vegjël të Shqipërisë.
Në Australi dhe Zelandën e Re, Shqipëria eksportoi mallra në vlerë 69 milionë lekë dhe importoi në vlerën 180 milionë lekë.
Drejt Amerikës së Jugut u eksportuan vetëm 39 milionë lekë në vlera mallrash, ndërsa u importuan rreth 9.3 miliardë lekë mallra.
Bilanc negativ vendi ynë ka edhe me Afrikën, ku në vitin 2016 importoi mallra në vlerë 8.2 miliardë lekë, por eksportoi vetëm 1.3 miliardë lekë mallra.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.