Pas 25 vitesh deputet, lë Kuvendin për të nisur mandatin e Presidentit, Meta betohet: Do të jem asnjanës dhe do respektoj Kushtetutën (Fjalimi)
Ilir Meta është betuar këtë të hënë në Kuvend si Presidenti i ri i Republikës së Shqipërisë. Në seancën e drejtuar nga Valentina Leskaj, Meta është betuar me dorën mbi Kushtetutë ndërsa në fjalën e mbajtur para deputetëve Meta tha se do të respektojë në frymë e në gërmë aktin themeltar të shtetit.
“Kushtetueshmëria, asnjanësia politike dhe respektimi i shtetit të së drejtës do të jenë referencë e akteve të mia. Do t’i shërbej dialogut dhe gjithpërfshirjes, sidomos në avancimin e reformave më jetike që e bëjnë Shqipërinë vend më të qendrueshëm e plotësisht europian” tha Meta gjatë fjalës së tij.
Papunësia, varfëria dhe emigracioni shqetësues i rinisë, sipas Presidentit Meta, janë sfidat kryesore me të cilat duhet të përballen institucionet. Po ashtu, Meta tha se reformat e qendrueshme e me rëndësi kombëtare duhet të jenë produkt konsensusi politik i palëve e për këtë qëllim garantoi se do të luajë rol të rëndësishëm.
Duke evidentuar rëndësinë e Reformës në Drejtësi, Meta siguroi se si kryetar shteti do të vijojë të luajë një rol të rëndësishëm në avancimin e saj. Krahas evidentimit të rolit të partnerëve ndërkombëtarë, në fjalimin e tij Meta nuk la jashtë vëmendjes shqiptarët e Kosovës e ata të Maqedonisë ndërsa evidentoi se shqiptarët janë në momentin më të mirë historik.
E në fund, Meta zgjodhi të bëjë “sqarim” kur tha se nëse në momentin e kandidimit për President kishte bërë një zgjedhje “më shumë me mendje se me zemër”, betimin në Kuvend si President po e bënte “me zemër”.
Ilir Meta është tashmë ka marrë zyrtarisht detyrën si President i Shqipërisë, pas 25 viteve si deputet e pasi ka ushtruar detyra të larta shtetërore si kryeministër, zëvëndëskryeministër e kryetar i Kuvendit.
E nderuar zonja Leskaj, drejtuese e Seancës,
I nderuar zoti Kryeministër, të nderuar Ministra,
Të nderuar zonja dhe zotërinj deputetë,
Të nderuar përfaqësues të komuniteteve fetare,
Shkëlqesi ambasadorë dhe përfaqësues të trupit diplomatikë,
Miq dhe të ftuar, të dashur bashkëkombas,
Sot kam nderin e veçantë t’ju përshëndes përzemërsisht dhe me ndjenjën më të madhe të përgjegjësisë kushtetuese e qytetare, në cilësinë e detyrës më të lartë të shtetit, në atë të Presidentit të Republikës së Shqipërisë.
Në këto momente solemne, duke përcjellë falënderimet për Kuvendin e Shqipërisë, që më zgjodhi në këtë detyrë fisnike, më lejoni që të dëshmoj solemnisht vullnetin tim të hekurt për të respektuar në gërmë dhe në frymë Kushtetutën e RSH, për të përmbushur të gjitha detyrat e mia kushtetuese, në interesin më të mirë të vendit, të kombit dhe të qytetarëve, pa kursyer në asnjë çast përkushtimin që kërkon lartësinë e detyrës, integritetin, drejtësinë dhe paanshmërinë.
Kushtetutshmëria, asnjëanësia politike, si edhe respektimi i shtetit të së drejtës, do të jenë referencat kryesore të vendimeve dhe akteve të mia presidenciale.
Gjithmonë do t’i shërbej frymës së konsensusit, dialogut, bashkëpunimit dhe gjithëpërfshirjes në interes të forcimit të institucioneve e bashkëpunimit ndërinstitucional, e sidomos të avancimit të reformave më jetike që e bëjnë Shqipërinë një vend më demokratik, më të qëndrueshëm, më të sigurtë e plotësisht europian.
25 vjet më parë u zgjodha deputet në këtë Kuvend, e sot më duhet të ndahem me jetën time parlamentare për të përmbushur një përgjegjësi të re dhe shumë të lartë, por i bindur për rëndësinë e forcimit të bashkëpunimit me Kuvendin në të ardhmen.
Në 25 vjet kam qenë pjesë aktive dhe e opozitës, edhe të mazhorancës. Kam përfaqësuar dy forca politike në detyrat nga më të rëndësishmet. Kam qenë në vijën e parë të ballafaqimit politik, por edhe të përpjekjeve për konsensus, për realizimin e marrëveshjeve të rëndësishme për stabilitetin dhe të ardhmen europiane të vendit.
Ashtu sikurse 27 vjet më parë isha pjesë e lëvizjes studentore, thirrja e së cilës “Ta bëjmë Shqipërinë si gjithë Europa” mbetet akoma një projekt i pambaruar.
Unë besoj se papunësia, varfëria dhe emigracioni shqetësues i rinisë, mbeten akoma armiqtë tanë të përbashkët të vërtetë. Këto janë sfidat e përbashkëta që duhen fituar në emër të të gjithë qytetarëve tanë pa asnjë dallim, e sidomos në emër të rinisë sonë e të ardhmes së vendit.
Reforma të qëndrueshme me rëndësi kombëtare, në funksion të forcimit të institucioneve dhe të konsolidimit të pavarësisë së tyre nuk mund të jenë produkt vetëm i një mazhorance, por i një sipërmarrjeje kolektive kombëtare, ku roli i opozitës është i pazëvendësueshëm dhe i domosdoshëm.
Një vit më parë në këtë Kuvend miratuam me konsensus të plotë ndryshimet kushtetuese për reformën në drejtësi, e cila është vendimtare për të ardhmen tonë europiane. Sot angazhohem edhe si president për të mbështetur zbatimin e drejtë e transparent të kësaj reforme, në interes të forcimit të shtetit të së drejtës, të luftës kundër korrupsionit e krimit të organizuar dhe përmirësimit të klimës së biznesit, aq e domosdoshme për të rritur ekonominë tonë më tej, e sidomos për të krijuar vende pune të mirëpaguara për të rinjtë tanë.
Zonja dhe zotërinj, të nderuar miq,
Përpjekjet tona demokratizuese dhe shtetformuese nuk do të kishin qenë të suksesshme pa mbështetjen e pakursyer të miqve dhe aleatëve tanë, të partnerëve ndërkombëtarë, sidomos të Shteteve të Bashkuara të Amerikës dhe të Bashkimit Europian.
Shqipëria jonë është prej disa vitesh anëtare e barabartë në NATO dhe pranë hapjes së negociatave për anëtarësim në Bashkimin Europian. Faktori Shqiptar në rajon është në kohët e veta më të mira.
Kosova është shtet i pavarur dhe ne besojmë se së shpejti do t’i gëzohet liberalizimit të vizave në Bashkimin Europian dhe lëvizjes së lirë të qytetarëve të saj.
Shqiptarët në Maqedoni janë me mundësi shumë të mëdha se në çdo kohë tjetër për ta çuar zbatimin e marrëveshjes së Ohrit në një stad të ri më cilësor.
Në Mal të Zi shqiptarët kanë qenë një faktor me peshë për ta orientuar shtetin e tyre drejt aleancave perëndimore.
Më shumë të drejta meritojnë shqiptarët e Luginës së Preshëvës, që do të kenë gjithmonë mbështetjen tonë të pakursyer.
Pavarësisht statusit të tyre brenda shteteve ku ndodhen, si shumicë apo pakicë, shqiptarët kanë luajtur e po luajnë rol stabilizues, konstruktiv e emancipues në të gjithë rajonin tonë.
Unë jam besimplotë për të vazhduar angazhimet tona maksimale për respektimin e të drejtave të pakicave etnike e kulturore në Shqipëri, në pajtim të plotë me konventat europiane e ato ndërkombëtare për të drejtat e njeriut.
Me të njëjtën përgjegjësi e korrektësi që do të respektojmë pakicat brenda vendit, nuk do të rreshtim së kërkuari tre vendeve të tjera ku jetojnë shqiptarët, respektimin e plotë të lirive dhe të drejtave të tyre.
Në botën e sotme që shkon pandalshëm drejt proceseve globalizuese dhe ndër varësisë së përgjithshme, oportunitetet si dhe kërcënimet ndaj paqes dhe rendit botëror nuk njohin kufi gjeografik. Prandaj ne do të vazhdojmë t’u përgjigjemi pozitivisht detyrimeve tona për zgjidhje të përbashkëta. Përkrah me partnerët tanë euroatlantikë ne do të luajmë rolin që na takon një sfidat e përbashkëta të cilat drejtpërdrejti a tërthorazi prekin edhe sigurinë tonë kombëtare dhe këtu kam parasysh në radhë të parë luftën kundër terrorizmit dhe kundër krimit të organizuar.
Të nderuar kolegë deputetë, në 28 Prill vendosa të kandidoja për President, më shumë me mendje se sa me zemër, sepse opozita nuk ishte këtu. Por sot dua t’ju siguroj se betimin e kam bërë plotësisht me zemër dhe bindje të plotë se zgjedhja që bëra në atë moment dha kontributin e saj modest edhe për të evituar një krizë që vendi dhe e ardhmja e tij europiane nuk e meritonin.
Duke ju falënderuar të gjithëve për bashkëpunimin e deritanishëm dua t’ju siguroj se në ushtrimin e kësaj përgjegjësie kaq të lartë që Kuvendi i Shqipërisë më ka besuar do të udhëhiqem vetëm nga dashuri e pakufijshme për Shqipërinë dhe për të gjithë shqiptarët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.