Pas karantinës, “bum” tregtia me pakicë – INSTAT: Shitjet u rritën me 12 % krahasuar me muajt e mbylljes, artikujt jo-ushqimorë rritje me 15,9 %
Hapja e ekonomisë dhe heqja e masave kufizuese të lëvizjes pas periudhës së karantinës së muajve të parë të vitit është pasuar menjëherë me një rritje të fortë të konsumit, veçanërisht të produkteve industriale. Pas rënies së fortë për gjysmën e parë të vitit, Tremujori i tretë ka shënuar një rikthim të tregtisë me pakice, duke kaluar jo vetëm nivelet e muajve të mbylljes, por edhe ato të vitit të mëparshëm. Sipas të dhënave të sapo publikuar nga INSTAT, shitjet në volum në tregtinë me pakicë janë rritur 0,7 %, krahasuar me të njëjtën periudhë të vitit 2019, ndërkohë që krahasuar me tremujorin paraardhës, ky tregues i përshtatur sezonalisht është rritur plot 12,0 %.
Në tregtinë me pakicë, pa përfshirë këtu tregtinë me pakicë të hidrokarbureve, volumi i shitjeve në tremujorin e tretë 2020 është rritur me 3,0 %, kundrejt tremujorit të tretë të vitit 2019. Në grupin “Ushqime, pije, duhan në njësi tregtare jo të specializuara dhe të specializuara”, volumi i shitjeve është rritur 0,2 %, krahasuar me të njëjtin tremujor të vitit 2019.
Volumi i shitjeve, për grupin “Artikuj jo-ushqimorë në njësi tregtare të specializuara dhe jo të specializuara”, është rritur 5,0 %, kundrejt të njëjtës periudhë të vitit paraardhës.
Në grupin “Tregti hidrokarbure në njësi tregtare të specializuara”,volumi i shitjeve ka pësuar rënie me 4,8 %, krahasuar me të njëjtin tremujor të vitit 2019.
Në tremujorin e tretë 2020, volumi i shitjeve, përshtatur sezonalisht, në grupin “Tregti me pakicë, pa përfshirë këtu tregtinë me pakicë të hidrokarbureve në njësi tregtare të specializuara”, është rritur me 9,9 %, krahasuar me tremujorin paraardhës.
Në grupin “Ushqime, pije, duhan në njësi tregtare jo të specializuara dhe të specializuara”, volumi i shitjeve, përshtatur sezonalisht, është ulur me 0,2 %, krahasuar me tremujorin paraardhës.
Volumi i shitjeve, përshtatur sezonalisht, në tregtinë me pakicë, për grupin “Artikuj jo-ushqimore në njësi tregtare të specializuara dhe jo të specializuara”, është rritur me 15,9 %, kundrejt tremujorit të mëparshëm.
Në grupin “Tregti me pakicë hidrokarbure në njësi tregtare të specializuara”, volumi i shitjeve, përshtatur sezonalisht, është rritur 21,1 %, kundrejt tremujorit të dytë 2020.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.