Pas KLP, gati dhe KLGJ/Gjonaj: Lëmë pas të shkuarën. Ambasada SHBA:  Disa prej jush kanë frikë!

Një ditë pas ngritjes së Këshillit të Lartë të Prokurorisë, rreth 340 gjyqtarë kanë votuar për përzgjedhjen e 6 anëtarëve të KLGJ-së.  Përpara nisjes së votimit, gjyqtarët janë përshëndetur nga Kreu i Gjykatës së Lartë Xhezair Zaganjori,  i cili tha se komuniteti i tyre numëron shumë pjesëtarë të përgjegjshëm ndërkohë që është anatemuar përmes shumë akuzave, por është vënë edhe nën presion nga krimi e korrupsioni.

Ministrja e Drejtësisë Etilda Gjonaj tha se është momenti që magjistratët të mësojnë nga gabimet e së shkuarës, ndërkohë që përmendi pagat e reja që do përfitojnë magjistratët nga 1 janari, si edhe faktin që Qevria tashmë ka përcaktuar edhe godinën ku do vendosen dy këshillat e reja të drejtësisë.

I pranishëm gjatë mbledhjes, Ambasadori i Bashkimit Evropian Luigi Soreca tha se Këshilli do jetë gur themeli për drejtësinë e re, ndërkohë që Përfaqësuesja e Ambasadës Amerikane Leyla Moses-One tha se disa prej gjyqtarëve mund t’i druhen ndryshimeve rrënjësore që po pëson sistemi. Gjyqtarët e pranishëm votuan 6 emrat që do të përfaqësojnë gjyqtarët në Këshillin e Lartë Gjyqësor, i cili përbehet në total nga 11 anëtarë.

Kandidaturat për këto 6 vende fillimisht ishin, për të zbritur në 8, pasi vetëm një ditë përpara votimit, Gjyqtarja e Gjykatës së Tiranës Alma Brati u tërhoq zyrtarisht nga gara. Për anëtarin nga Gjykata e Lartë në KLGJ, kandidatura e vetme ishte ajo e Medi Bicit. Për dy vendet nga Gjykatat e Apeleve garuan Ilir Toska, Nertina Kosova dhe Brikena Ukperaj.

Ndërsa për tre vendet e Gjykatave të Shkallës së Parë, garuan katër kandidatë Astrit Faqolli, Brunilda Kadi, Manjola Xhaxho dhe Marcela Shehu. Gjyqtarët shprehën përzgjedhjet e tyre në 6 fletë të ndryshme votimi, një për kandidatin e Gjykatës së Lartë, 2 për të Gjykatave të Apeleve dhe 3 për kandidatët e Gjykatat e Shkallëve të Para. Në fund të votimit, 6 emrat që do përfaqësojnë gjyqtarët në Këshillin e Lartë Gjyqësor janë: Dritan Hallunaj, Brunilda Kadi, Marcela Shehu, Medi Bici, Brikena Ukperaj dhe Ilir Toska.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.