Pas Korçës, investitorët ‘shënjestrojnë’ Dibrën – 2 aplikime të reja për hidrocentrale të vegjël
Pas Korçës, Dibra është një tjetër qark që po merr një vëmendje të madhe të investitorëve për shfrytëzimin e pasurive hidrike. Ministria e Infrastrukturës dhe Energjisë njofton se kanë mbërritur dy aplikime të reja për ndërtimin e hidrocentraleve me kapacitet të ulët prodhues.
Kështu, shoqëria ‘Ro-Gent-1’ sh.p.k ka shprehur interesin për miratimin e ndërtimit të një impianti hidroenergjitik (Aras-M) në lumin e Zallit të Bulqizës. Ajo ka si objekt të aktivitetit të saj shfrytëzimin e pasurive natyrore, nëntokësore dhe mbitokësore si dhe prodhim/shitje/blerje/ transportim të kromit dhe pasurive të tjera minerale.
Ndërkohë, HEC-i tjetër ‘Maia’ ëhstë projektuar të ndërtohet në përroin e Abatit, degë e lumit të Shalës. Shoqëria që ka dërguar aplikimin pranë MIE mban emrin ‘Tradita G&T’ sh.p.k dhe kapaciteti i instaluar i këtij impianti është 2MW. Ndërsa, nuk bëhet e ditur vlera e investimit për asnjërin nga veprat hidroenergjitike të mësipërme.
Vetëm pak ditë më parë, Banka Europiane për Rindërtim dhe Zhvillim (BERZH), në një dokument të fundit të publikuar i ka bërë apel Shqipërisë që të hedhë sytë edhe nga burimet e tjera të rinovueshme të energjisë dhe mos të fokusohet vetëm tek pasuritë hidrike.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.