Pas noterisë, Kuvendi kalon te tarifat e gjykatave dhe shërbimi juridik falas! Nga tarifat e reja te ndihma për ata që kanë më pak se 500 mijë lekë
Pas projektligjit për noterinë, Komisioni parlamentar i Ligjeve do të shqyrtojë të mërkurën projektligjin që përcakton tarifat e reja të gjykatave.
Projektligji për “Tarifat dhe shpenzimet gjyqësore” pritet të sjellë rritjen e tarifave gjyqësore në të gjitha shkallët e sistemit juridik. Ndryshimi në tarifa pritet që të ulë mbingarkesën e gjykatave, si dhe do të mundësojë ofrimin e një shërbimi më të mirë, pasi 10% nga të ardhurat do të përfitohen nga vetë gjykatat. Shtesa në buxhet do të përdoret për të përmirësuar kushtet e punës, si edhe për një shpërblim më të mirë të gjyqtarëve dhe administratës gjyqësore.
Për më shumë kliko: Shtrenjtohen tarifat gjyqësore, ja vlerat e reja – Të ardhurat do t’i përfitojnë vetë gjykatat
Por krahas tarifave të reja, projektligji i ri pritet të sjellë edhe disa risi. Ndër të tjera, për gjykimin e kërkesave civile, administrative dhe penale vendosen dy tarifa fikse prej 2.500 (dymijë e pesëqind) lekësh dhe prej 5.000 (pesëmijë) lekësh për çështje të caktuara, raporton portali SCAN.
Por edhe pse vendosen tarifa fikse, projektligji i depozituar në Kuvend parashikon që duke nisur nga 1 janari i vitit të ardhshëm, ato do të pësojnë rritje progresive me 500 lekë çdo vit.
Për më shumë kliko: Tarifa të reja për 56 lloje padish në gjykata!
Krahas projektligjit për tarifat e gjykatave, Komisioni i Ligjeve ka planifikuar të shqyrtojë edhe projektligjin për ndihmën juridike. Projektligji pritet të sjellë një zgjerim të kategorive të personave që përfitojnë ndihmën juridike falas. Ata që kanë më pak se 500 mijë lekë të ardhura në vit përfitojnë nga skema, megjithatë, nëse gjendja ekonomike e tyre përmirësohet në dy vitet pasuese, ata duhet të paguajnë detyrimet.
Për më shumë, kliko edhe: Shpenzimet e gjyqeve falas për ata që kanë më pak se 500 mijë lekë të ardhura! Por duhen kthyer nëse gjendja ekonomike përmirësohet në 2 vite.
Këto projektligje vijnë si paketë shoqëruese e Reformës në Drejtësi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.