Pas shtyrjes së parë, apeli i e-Albania: Bizneset të mos e lënë për ditën e fundit dorëzimin e pasqyrave. Afat deri me 30 shtator  

Portali i shërbimeve publike e-Albania u bën apel bizneseve që të mos e lënë për ditën e fundit dorëzimin e pasqyrave financiare dhe raporteve të auditit vjetor online te Qendra Kombëtare e Biznesit.

Në këtë mënyrë, sipas e-Albania, bizneset shmangin tarifimin shtesë për mosrespektimin e afateve.  Jo në pak raste, fluksi i lartë i aplikimeve online në momentet e fundit të afatit ka sjellë mbingarkesë dhe probleme me funksionimin e sistemit.

Ky është afati i dytë i vendosur nga QKB për dorëzimin e pasqyrave financiare. Afati i parë ishte data 30 korrik por për shkak të fluksit të lartë të aplikimeve, sistemi u bllokua duke e bërë në këtë mënyrë të detyrueshme shtyrjen e afatit me 2 muaj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.