Pas vetëm një rasti me COVID – 19, Kina teston të gjithë banorët e qytetit
Kina ka vendosur të testojë të gjithë banorët e qytetit, pas rastit të parë të shfaqur me COVID – 19 në Kashgar, Xinjiang. Rreth 4.7 milionë njerëz po testohen, me 138 raste asimptomatike të gjetura deri më tani.
Kina ka qenë kryesisht e suksesshme në uljen e niveleve të infeksionit, edhe pse vazhdojnë “shpërthimet” e vogla. Shkollat në Kashgar janë mbyllur dhe banorët nuk lejohen të dalin nga qyteti nëse nuk kanë rezultatin negativ të testimit.
Rasti i parë në shpërthimin në qytetin Kashgar ishte një grua asimptomatike që punonte në një fabrikë veshjesh në qarkun Shufu, në periferi të qytetit. Gruaja, e cila u zbulua se ishte e infektuar pas asaj që media shtetërore kineze e përshkroi si “test rutinë”, ishte rasti i parë lokal i zbuluar në territorin e Kinës për 10 ditë.
Testimi i përhapur, i cili filloi të Shtunën, zbuloi edhe 137 raste asimptomatike. Më shumë se 2.8 milionë teste u kryen në Kashgar deri të Dielën pasdite dhe pjesa tjetër do të përfundojë brenda dy ditësh, sipas zyrtarëve të qytetit.
Ndërsa jeta normale ka rifilluar në pjesën më të madhe të Kinës, vazhdojnë të shfaqen raste të vogla, që autoritetet kanë zgjedhur për të trajtuar me testime të menjëhershme masive.
Më parë në tetor, qyteti Qingdao testoi të gjithë popullsinë e tij prej nëntë milion njerëz. Në maj, Kina testoi 11 milionë banorë të Wuhan, qyteti ku u identifikua për herë të parë koronavirusi i ri.
Burimi origjinal: BBC
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.