Pasaporta e vaksinës në Britani / Mbi 70 deputetë kundërshtojnë certifikatën “diskriminuese” të Covid-19
Mbi 70 deputetë në Britani kanë kundërshtuar prezantimin e pasaportës së vaksinës, që qeveria po konsideron për të ndihmuar ekonominë, ndërkohë që heq disa masa të karantinës së Covid-19. Qeveria po shqyrton idenë e vërtetimit të vaksinimit nga njerëzit, për të aksesuar hapësira publike si pabet apo eventet sportive, ndërkohë që Kryeministri Boris Johnson ka thënë se një certifikatë do të jetë e nevojshme për udhëtimin ndërkombëtar.
E përditshmja “Daily Telegraph” raportoi më herët gjatë Javës se provat e pasaportave të Covid-19 mund të nisin brenda disa javëve. Johnson tha se një kombinim i faktorëve të imunitetit, nëse njerëzit kanë kaluar sëmundjen, kanë marrë vaksinën apo kanë një test të covid-19, mund t’i japin besim bizneseve.
“Këto tre faktorë do jenë të nevojshëm për të ecur përpara”- tha Johnson. Megjithatë, ka pasur shqetësime brenda partisë Konservatore si dhe nga opozita, mbi certifikatat e vaksinave. “Ne kundërshtojnë përdorimin diskriminues të një certifikate mbi statusin e Covid, që do mohojë aksesin e individëve në shërbimet e përgjithshme”- shkruhej në deklaratë të nënshkruar nga mbi 70 deputetë. Nën “hartën” e qeverisë për të dalë nga pandemia, pabet do të lejohen ti shërbejnë njerëzve në ambiente të jashtme më vonë gjatë muajit, ndërkohë që lehtësime të tjera mund të ndodhin në mes të Majit. Më shumë se 31 milionë britanikë kanë marrë dozën e parë të vaksinës, në programin më të shpejtë të vaksinimit në Evropë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.