Pasaporta shqiptare, më shumë e lanë se sa e fituan – Rritet numri i atyre që lënë shtetësinë
Pasaporta shqiptare, me vetëm 67 shtete ku mund të lëvizësh pa viza dhe 42 ku viza merret në mbërritje, sigurisht që nuk është ndër më të fuqishmet në botë. Në fakt ajo qëndron pas edhe asaj të Serbisë, Maqedonisë e Malit të Zi.
Gjithsesi, ajo është shumë e vlefshme për shqiptarët e Kosovës, të cilët kërkojnë të lëvizin lirisht përtej 15 vendeve që u mundëson pasaporta e tyre. Kjo është një nga arsyet kryesore për 316 rastet e personave që kanë fituar shtetësi shqiptare gjatë vitit 2017. Kjo shifër është madje në rritje me 12.5% krahasuar me një vit më parë.
Por ky nuk është treguesi i vetëm, pasi në rritje shfaqet edhe numri i personave që kanë hequr dorë nga shtetësia shqiptare. Për vitin që lamë pas këta individë rezultuan në 651 persona, me një rritje me 1/3 nga viti në vit.
Pra duket se shifrat e lënies së shtetësisë tejkalojnë ato të marrjes prej disa kohësh tashmë. Një nga arsyet për këtë braktisje të pasaportës shqiptare është edhe marrja e shtetësisë së huaj të emigrantëve që jetojnë në vende si Gjermania, të cilat nuk lejojnë dyshtetësinë për qytetarët nga vendet jo të BE.
Nëse marrim parasysh efektin që do të ketë liberalizimi i vizave me zonën Schengen për qytetarët e Kosovës, raporti marrje/lënie shtetësie pritet të thellohet.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.