Pasiguria ekonomike në rritje – Dilemat e normalizimit të interesave, BSH s’jep më afate
Deri vitin e kaluar, Banka e Shqipërisë shprehej se mesi i vitit 2019 mund të ishte koha për të nisur të ashtuquajturin normalizim monetar ose rritjen graduale të normave të interesit nga nivelet minimale historike.
Por, skenarët duket po ndryshojnë, edhe në ndjekje të asaj që po ndodh në Eurozonë. Lajmet e këqija që po vijnë nga ekonomia e kanë detyruar Bankën Qendrore Europiane ta lërë mënjanë idenë për të rritur interesat; jo vetëm kaq, po tashmë po diskutohet edhe mundësia e rinisjes së stimujve sasiorë. Këto zhvillime nuk mund të mos prekin edhe Shqipërinë, për shkak të varësisë së natyrshme nga ekonomia europiane.
Projeksionet pesimiste për ekonominë e Eurozonës kanë bërë që edhe skenarët e rritjes së ekonomisë shqiptare të korrigjohen në ulje. Kthimi më i vonuar i ekonomisë në ekuilibër dhe i inflacionit në objektiv do të ndikojnë edhe ecurinë e normave të interesit në ekonomi. Në fakt, Banka e Shqipërisë e ka shtyrë vetëm lehtësisht kthimin e inflacionit në objektiv, në fillim të vitit 2021. Por, nga ana tjetër, në deklarata e fundit të Këshillit Mbikëqyrës mungojnë të ashtuquajturat forward guidance ose orientimet për tregun, lidhur me kohën e pritshme kur normat e interesit do të rriten.
Kjo dëshmon se pasiguria për rimëkëmbjen e ekonomisë po shtohen, çka në fakt është pohuar edhe nga vetë Banka e Shqipërisë. Në raportin e fundit të politikës monetare, nënvizohet se rreziqet janë në rritje, jo vetëm për shkak të sinjaleve negative që vijnë nga Eurozona. Të tjerë faktorë me ndikim potencialisht negativ mund të jenë vazhdimi i efektit negative të kursit të këmbimit në inflacion, kreditimi i ngadaltë i ekonomisë, si edhe rreziqet gjithnjë e më në rritje nga kriza politike.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.