Pasojat e konfliktit SHBA-Kinë / Kinezët zhvendosin 50 miliard dollarë kripto-monedha në investime të huaja

Qytetarët kinezë zhvendosën 50 miliardë dollarë vlerë kripto-monedhash jashtë vendit duke shkelur kufijtë e transaksioneve kapitale pasi marrëdhëniet midis SHBA-së dhe Kinës vazhdojnë të tendosen, thuhet në një raport.

Një raport i botuar të enjten nga firma e forenzikës blockchain Chainalysis thoshte se qytetarët kinezë kanë shkelur rregullat e kapitalit, pasi qeveria lejon qytetarët të lëvizin afërsisht vetëm 50,000 dollarë ose më pak jashtë vendit çdo vit.

Chainalysis shtoi se qytetarët e pasur kanë bërë transaksione përmes investimeve të huaja në pasuri të paluajtshme dhe pasuri të tjera – ndonjëherë edhe duke maskuar investimet përmes kompanive guackë.

“Gjatë dymbëdhjetë muajve të fundit, me ekonominë e Kinës që vuan për shkak të luftërave tregtare dhe zhvlerësimit të juanit në pika të ndryshme, ne kemi parë një lëvizje me vlerë mbi 50 miliardë dollarë të kripto-monedhave nga adresat me bazë në Kinë në adresat jashtë shtetit”, tha Chainalysis.

Raporti vuri në dukje se kripto-monedha më e përdorur për këto transaksione ishte Tether, që është e njohur nga ekspertët si ‘stablecoin’

Stablecoin-at janë kripto-monedha që synojnë të zvogëlojnë paqëndrueshmërinë. Ajo mund të jetë e lidhur me kripto-monedha të tjera, mallra të tregtuara nga këmbimi ose pasuri të paluajtshme.

D.B – SCAN
Burimi: Business Insider

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.