Pasojat e tërmetit, Çuçi: Gati për fazën e re! Me inxhinierët po vlerësojmë gjendjen e godinave dhe përllogaritjen e dëmeve
Koordinatori i grupit të menaxhimit të krizës së shkaktuar nga tërmeti në qarkun e Durrësit, Bledi Çuçi njofton se menjëherë pas mbledhjes së qeverisë sot, ka nisur puna me strukturat dhe autoritetet që po ndjekin hap pas hapi në terren situatën e vështirë dhe përmbushjen e detyrave të përcaktuara nga Kryeministri.
“Falë përpjekjes së madhe të ekipeve të emergjencave nga brenda dhe jashtë vendit, operacioni i kërkim-shpëtimit po shkon drejt fundit. Tani po bëhemi gati të nisim një fazë të re, po aq të vështirë sa kërkim-shpëtimi dhe që kërkon angazhim maksimal të të gjitha strukturave.
Grupe të përbashkëta pune me inxhinierë dhe teknikë shqiptarë e të huaj do të bëjnë vlerësimin e gjendjes së godinave, izolimin e tyre sipas rastit dhe përllogaritjen e të gjitha dëmeve.
Ky proces i paraprin përpjekjes tjetër të përbashkët për rindërtimin e shtëpive të shembura nga tërmeti shkatërrimtar dhe strehimin e të gjithë banorëve” njofton Çuçi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.