“Pastrimet” ulin kredinë, BSH: Portofoli ra me 4 mld lekë në dhjetor

Kredia për ekonominë pësoi rënie në dhjetor të vitit të kaluar, kryesisht si efekt i pastrimit të portofolave nga kreditë me probleme, para mbylljes së bilanceve vjetore.

Sipas statistikave të Bankës së Shqipërisë, në fund të dhjetorit portofoli i kredisë për ekonominë ra në 550 miliardë lekë, nga rreth 554 miliardë lekë që kishte qenë në nëntor.

Sidoqoftë, me bazë krahasimi vjetor, kredia rezulton në rritje, me rreth 3 miliardë lekë më shumë se e njëjta periudhë e një viti më parë.

Kjo tregon se kreditimi përgjithësisht ka një tendencë në përmirësim, përtej një efekti sezonal që regjistrohet në vitet e fundit, për shkak të detyrimit rregullativ për të nxjerrë jashtë bilancit kreditë e humbura.

Kjo u verifikua edhe në dhjetorin e vitit të kaluar, e shoqëruar madje edhe me shitje në vlera të konsiderueshme të kredive problematike te institucione financiare të specializuara në mbledhjen e detyrimeve.

Veç efektit në pakësimin e portofolit, këto operacione  ndihmuan në uljen e raportit të kredive me probleme në 13.2%, niveli më i ulët që nga korriku 2010.

Nëse përjashtojmë efektin e kredive të fshira nga statistikat, Banka e Shqipërisë konstaton se tendencat e kreditimit kanë qenë pozitive edhe në tremujorin e fundit të vitit të kaluar, sidomos për individët.

Në tremujorin e katërt ky portofol u rrit me 2 miliardë lekë. Edhe pse kjo rritje është më e ulët se në tremujorin paraardhës, në terma vjetorë kredia për individë mbajti të njëjtën normë rritjeje prej mesatarisht 6.9%.

Portofoli i kredisë për biznese ka shfaqur norma të ulëta rritjeje në tremujorin e katërt të vitit, i ndikuar si nga tkurrja tremujore ashtu edhe nga efekti statistikor i bazës krahasuese.

Kredia për biznese u tkurr me 1 miliardë lekë në tremujorin e katërt, duke shënuar një rënie të ndjeshme, krahasuar me rritjen prej 8 miliardë lekësh të tremujorit të tretë. Edhe pse në tremujorin e katërt të vitit kredia e re është më e lartë se një vit më parë, fshirjet e larta të kredisë në këtë portofol kanë çuar në tkurrjen e tepricës së kredisë për biznese.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.