Pastrimi i parave dhe financimi i terrorizmit / OJF-të trajnohen nga eksperti britanik, për të shmangur riskun e përfshirjes

Parandalimi i pastrimit të parave dhe financimi i terrorizmit janë kthyer në dy nga çështjet më kryesore financiare në sistemin e sotshëm shqiptar.

Drejtoria e Përgjithshme e Tatimeve ka njoftuar se në kuadër të nismës për të luftuar këto dy fenomene mjaft të rrezikshme ka kryer një trajnim të plotë me 35 përfaqësues të Organizatave Jo-Fitimprurëse. Udhëheqësi i trajnimit ka qenë eksperti britanik z.Joshua Fabridge, me një eksperiencë të spikatur në veprimtarinë e kësaj fushe.

Gjatë trajnimit pjesëmarrësit patën mundësinë të njiheshin me mënyrat se si OJF-të mund të bëhen viktima të këtyre fenomeneve, mënyrat se si mund t’i parandalojnë ato, si dhe të njiheshin me të gjithë kuadrin ligjor të vënë në dispozicion nga qeveria shqiptare për të luftuar pastrimin e parave dhe financimin e terroristëve.

Jo, në pak raste OJF-të shqiptare janë cilësuar si jo-ekzistente dhe pa asnjë kontribut në shoqërinë civile, mirëpo statusi i krijimit të tyre i lejon mundësinë të qarkullojnë shuma të mëdha parash, në emër të aktiviteteve dhe fushatave bamirëse, që shpeshherë nuk vihen në jetë, por përdoren si justifikim për pastrimin e parave dhe financimin e aktiviteteve të paligjshme

Inspektorët e kontrollit tatimor gjithashtu janë trajnuar mbi Udhëzimin: “Për mbikëqyrjen e organizatave jofitimprurëse në funksion të parandalimit të pastrimit të parave dhe financimit të terrorizmit”. Ata kanë ofruar të gjithë mbështetjen dhe asistencën e nevojshme për të ndjekur procedurat dhe praktikat e duhura si nga ana  ligjore ashtu edhe tatimore për organizatat e OJF-ve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.